ഭാര്യയെ വിളിച്ചുണര്‍ത്തി ട്രെയിനുമുന്നില്‍ തള്ളിയിട്ടുകൊന്നു; കുട്ടികളുമായി ഭര്‍ത്താവ് മുങ്ങി

മുംബൈ: റെയില്‍വെ സ്റ്റേഷനിലെ പ്ലാറ്റ്ഫോമില്‍ ഉറങ്ങിക്കിടന്ന ഭാര്യയെ വിളിച്ചുണര്‍ത്തി ട്രെയിനിന് മുമ്പില്‍ തള്ളിയിട്ട ശേഷം കുട്ടികളേയും കൊണ്ട് ഭര്‍ത്താവ് മുങ്ങി. മഹാരാഷ്ട്രയിലാണ് ഞെട്ടിക്കുന്ന സംഭവം. പല്ഘര്‍ ജില്ലയിലെ വാസൈ റോഡ് റെയില്‍വേ സ്റ്റേഷനില്‍ നടന്ന സംഭവത്തിന്റെ സിസിടിവി ദൃശ്യങ്ങള്‍ പുറത്തുവന്നിട്ടുണ്ട്. അഞ്ചാം നമ്പര്‍ പ്ലാറ്റ്‌ഫോമില്‍ ഉറങ്ങിക്കിടക്കുന്ന യുവതിയെ വിളിച്ചുണര്‍ത്തിയ ശേഷം ഓടിക്കൊണ്ടിരിക്കുന്ന ട്രെയിനിന് മുമ്പിലേക്ക് ഇയാള്‍ തള്ളിയിടുകയായിരുന്നു. ഇവര്‍ക്കൊപ്പം രണ്ടുകുട്ടികളും ഉണ്ടായിരുന്നു. യുവതിയെ ട്രെയിനിന് മുമ്പില്‍ തള്ളിയിട്ട ശേഷം ഇയാള്‍ രണ്ടുകുട്ടികളേയും കൊണ്ട് മുങ്ങുന്നതും റെയില്‍വേ സ്റ്റേഷനില്‍ സ്ഥാപിച്ചിരിക്കുന്ന സി.സി.ടി.വി. ദൃശ്യങ്ങളില്‍ വ്യക്തമാണ്. ആവാദ് എക്‌സപ്രസിന് മുമ്പിലേക്കാണ് യുവതിയെ തള്ളിയിട്ടതെന്ന് അസിസ്റ്റന്റ് കമ്മീഷണര്‍ ബാജിറാവോ മഹാജനെ ഉദ്ധരിച്ച് പി.ടി.ഐ. റിപ്പോര്‍ട്ട് ചെയ്യുന്നു. ദമ്പതിമാര്‍ റെയില്‍വേ സ്റ്റേഷനില്‍ വെച്ച് തര്‍ക്കത്തില്‍ ഏര്‍പ്പെട്ടിരുന്നതായും ഇതിന് ശേഷം രണ്ടു കുട്ടികള്‍ക്കൊപ്പം കിടന്നുറങ്ങുകയായിരുന്നുവെന്നും പോലീസ് പറഞ്ഞു. പ്രതി രണ്ടു കുട്ടികളേയും കൊണ്ട് പിന്നീട് ദാദറിലേക്കുള്ള ട്രെയിന്‍ കയറിയതായാണ് വിവരം. ഇയാള്‍ക്ക് വേണ്ടിയുള്ള അന്വേഷണം ശക്തമാക്കിയിരിക്കുകയാണ്. യുവതി സംഭവ സ്ഥലത്തുവെച്ച് തന്നെ മരിച്ചതായാണ് റിപ്പോര്‍ട്ട്.