ലഹരി ഉപയോഗിച്ച് വ്യോമഗതാഗതം നിയന്ത്രിക്കാനെത്തി; ഡല്‍ഹിയില്‍ എടിസി ജീവനക്കാരനെതിരെ നടപടി

ന്യൂഡല്‍ഹി: ലഹരിമരുന്ന് ഉപയോഗിച്ച് ജോലിക്കെത്തിയ എയര്‍ ട്രാഫിക് കണ്‍ട്രോളറെ (എ.ടിസി) ജോലിയില്‍നിന്ന് മാറ്റിനിര്‍ത്തി. ഡല്‍ഹി ഇന്ദിരാഗാന്ധി വിമാനത്താവളത്തിലെ എ.ടി.സി. ജീവനക്കാരനേയാണ് ഡയറക്ടര്‍ ജനറല്‍ ഓഫ് സിവില്‍ ഏവിയേഷന്‍ (ഡി.ജി.സി.എ.) മാറ്റിയത്. ഓഗസ്റ്റ് 18-നായിരുന്നു സംഭവമെന്ന് അടുത്തവൃത്തങ്ങളെ ഉദ്ധരിച്ച് പി.ടി.ഐ. റിപ്പോര്‍ട്ട് ചെയ്യുന്നു. ഇതാദ്യമായിട്ടാണ് ഇത്തരത്തില്‍ ഒരു സംഭവം റിപ്പോര്‍ട്ട് ചെയ്യുന്നത്. ഈ വര്‍ഷം തുടക്കത്തില്‍ വിമാനത്താവള ഉദ്യോഗസ്ഥര്‍ക്ക് ലഹരി ഉപയോഗവുമായി ബന്ധപ്പെട്ട ടെസ്റ്റ് നടത്താന്‍ നിര്‍ദ്ദേശിച്ചു കൊണ്ടുള്ള പുതിയ നിര്‍ദ്ദേശം അടങ്ങിയ സര്‍ക്കുലര്‍ പുറപ്പെടുവിച്ചിരുന്നു. ഇതില്‍ വിമാനത്തിലെ ഉദ്യോഗസ്ഥരേയും എ.ടി.സി. ഉദ്യോഗസ്ഥരേയും ഉള്‍പ്പെടുത്തിയിരുന്നു. തുടര്‍ന്ന് നടത്തിയ ടെസ്റ്റിലാണ് എ.ടി.സി. ഉദ്യോഗസ്ഥന്‍ ലഹരി ഉപയോഗിച്ചിരുന്നതായി കണ്ടെത്തിയത്. നിയമം നടപ്പിലാക്കിയതിന് ശേഷം ഇതുവരേയായി വിവിധ വിമാനങ്ങളിലെ മൂന്ന് പൈലറ്റുമാരെ ഇത്തരത്തില്‍ ലഹരി ഉപയോഗിച്ചതായി കണ്ടെത്തിയിരുന്നു. എന്നാല്‍ എ.ടി.സിയില്‍ ഇതാദ്യമാണ്. ടെസ്റ്റില്‍ പോസിറ്റീവ് ആകുന്ന വ്യക്തി വീണ്ടും ഒരുതവണ കൂടി ഇത്തരത്തില്‍ പിടിക്കപ്പെട്ടാല്‍ അയാളുടെ ലൈസന്‍സ് മൂന്ന് വര്‍ഷത്തേക്ക് സസ്‌പെന്‍ഡ് ചെയ്യും. മൂന്നാമതും പിടിക്കപ്പെടുകയാണെങ്കില്‍ റദ്ദാക്കും.