ഭര്‍ത്താവിനോടുള്ള ക്രൂരത വിവാഹമോചനത്തിന് മതിയായ കാരണമെന്ന് കുടുംബകോടതി

മഞ്ചേരി: നിരന്തരം ഉപദ്രവിക്കുന്ന ഭാര്യയില്‍ നിന്നും വിവാഹമോചനം നേടുവാനുള്ള അവകാശം ഭര്‍ത്താവിനുണ്ടെന്ന് കോടതി. മഞ്ചേരി പയ്യനാട് കാട്ടില്‍പുറത്ത് അലവി (70) സനല്‍കിയ ഹര്‍ജിയിലാണ് മലപ്പുറം കുടുംബ കോടതി ജഡ്ജി എന്‍ വി രാജു നിര്‍ണ്ണായകമായ വിധി പ്രസ്താവിച്ചത്. ഹരിജിക്കാരന്‍ 1977ലാണ് പൂക്കോട്ടൂര്‍ വെള്ളൂര്‍ സ്വദേശിനിയെ വിവാഹം കഴിക്കുന്നത്. വിദേശത്ത് ജോലി ചെയ്തുണ്ടാക്കിയ സമ്പാദ്യം മുഴുവന്‍ ഭാര്യക്കും മക്കള്‍ക്കും നല്‍കിയ ഹരജിക്കാരന്‍ പ്രവാസ ജീവിതം മതിയാക്കി നാട്ടിലെത്തിയപ്പോഴായിരുന്നു ഭാര്യയുടെ ഉപദ്രവം ആരംഭിച്ചത്. ഹൃദ്രോഗിയായ തന്റെ ചികിത്സാരേഖകള്‍ കത്തിച്ച ഭാര്യ തന്നെ വീട്ടില്‍ പ്രവേശിക്കുന്നത് തടഞ്ഞതായും ഹര്‍ജിയില്‍ പറയുന്നു. 2021 മാര്‍ച്ച് പത്തിന് ഭാര്യയെ ത്വലാഖ് ചെയ്തിരുന്നെങ്കിലും ഇത് അംഗീകരിക്കാതെ ഭാര്യ തിരികെ വീട്ടിലെത്തി പീഡിപ്പിക്കുകയാണെന്നും ഹരജിയില്‍ ചൂണ്ടിക്കാട്ടി. ഹരജിക്കാരന്‍ ഭാര്യയില്‍ നിന്നും ക്രൂര പീഡനത്തിന് വിധേയനായെന്നും വിവാഹ മോചനം ചെയ്ത് അയച്ച കത്ത് കിട്ടിയില്ലെന്ന എതിര്‍ഭാഗത്തിന്റെ വാദം തെറ്റാണെന്നുമുള്ള ഹരജിഭാഗം അഭിഭാഷകന്‍ എ പി ഇസ്മായിലിന്റെ വാദം കോടതി അംഗീകരിക്കുകയായിരുന്നു. ഭര്‍ത്താവ് വീട് ഉപയോഗിക്കുന്നത് വിലക്കുന്ന ഭാര്യയുടെ നടപടി കോടതി ഇന്‍ജങ്ഷനിലൂടെ തടഞ്ഞു. ഭര്‍ത്താവ് വീട്ടില്‍ പ്രവേശിക്കുന്നത് തടയുകയോ ക്രൂരത തുടരുകയോ ചെയ്യുന്ന പക്ഷം ഭാര്യ വീട്ടില്‍ പ്രവേശിക്കുന്നത് തടയുന്നതിനുള്ള ഉത്തരവ് നല്‍കുമെന്നും കോടതി മുന്നറിയിപ്പ് നല്‍കി. നേരത്തെ ത്വലാഖ് ചൊല്ലിയ നടപടി മതപരമായും നിയമപരമായും ശരിയാണെന്നും കോടതി വിധിച്ചു.