ഇടുക്കി ഡാമില്‍ റെഡ് അലര്‍ട്ട്; ഇന്ന് തുറന്നേക്കും: ആലുവയില്‍ ജലനിരപ്പുയരും

തൊടുപുഴ: ഇടുക്കി ചെറുതോണി ഡാമില്‍ റെഡ് അലര്‍ട്ട് പ്രഖ്യാപിച്ചു. ഡാം ഇന്നു തുറന്നേക്കും. ഡാമിലെ അധിക ജലം സ്പില്‍വേയിലൂടെ ഒഴുക്കി വിടുന്നതിന്റെ ഭാഗമായി എമര്‍ജന്‍സി പ്ലാനിങ് മാനേജര്‍ മൂന്നാം ഘട്ട മുന്നറിയിപ്പായി ഇന്നു രാവിലെ 7.30 മുതലാണ് റെഡ് അലര്‍ട്ട് പ്രഖ്യാപിച്ചത്. പെരിയാറിന്റെ ഇരുകരകളിലുമുള്ളവര്‍ ജാഗ്രത പാലിക്കണം. ഡാമിലെ ജലനിരപ്പ് 2382.52 അടിയായി. അണക്കെട്ട് തുറക്കുന്നതിനുള്ള മുന്നൊരുക്കങ്ങള്‍ കെഎസ്ഇബി നടത്തുന്നു. ഇടുക്കിയില്‍ വെള്ളം തുറന്നുവിട്ടാല്‍ ആലുവയില്‍ ജലനിരപ്പ് ഉയരുന്നതിന് കാരണമാകും. മുല്ലപ്പെരിയാര്‍ ഡാമിന്റെ 10 ഷട്ടറുകള്‍ ഇന്നലെ തുറക്കുകയും ഇടുക്കിയിലേക്കുള്ള നീരൊഴുക്ക് ശക്തമായി തുടരുകയും ചെയ്യുന്നതിനാല്‍ ചെറുതോണിയില്‍ ജലനിരപ്പ് ഉയരുകയാണ്. കഴിഞ്ഞ വര്‍ഷത്തെക്കാള്‍ 10 അടിയിലേറെ വെള്ളമാണ് നിലവില്‍ ഡാമിലുള്ളത്. കഴിഞ്ഞ വര്‍ഷം 3 തവണ അണക്കെട്ട് തുറന്നിരുന്നു.