പ്രണയത്തില്‍നിന്ന് പിന്‍മാറിയ പെണ്‍കുട്ടിയെ തട്ടിക്കൊണ്ടു പോയി; സിനിമാസ്‌റ്റൈല്‍ ചേസിങ്, രക്ഷപ്പെടുത്തല്‍

ചെന്നൈ പ്രണയത്തില്‍നിന്ന് പിന്‍മാറിയ പെണ്‍കുട്ടിയുടെ വീട്ടിലേക്ക് ഇരച്ചുകയറിയ കാമുകനും സുഹൃത്തുക്കളും, അച്ഛനെയും അമ്മയെയും കത്തിമുനയില്‍ നിര്‍ത്തി പെണ്‍കുട്ടിയെ തട്ടിക്കൊണ്ടുപോയി. മണിക്കൂറുകള്‍ നീണ്ട സിനിമാ സ്‌റ്റൈല്‍ ചേസിങ്ങിനൊടുവില്‍ പൊലീസ് സംഘം പെണ്‍കുട്ടിയെ മോചിപ്പിച്ച് അക്രമികളെ കസ്റ്റഡിയിലെടുത്തു. തമിഴ്‌നാട്ടിലെ മൈലാടുതുറയിലാണ് സിനിമാ രംഗങ്ങളെ വെല്ലുന്ന തട്ടിക്കൊണ്ടു പോകല്‍ അരങ്ങേറിയത്. ചൊവ്വാഴ്ച രാത്രിയാണ് സംഭവം. തഞ്ചാവൂര്‍ ആടുതുറ സ്വദേശി വിഘ്‌നേശ്വരന്‍ മൈലാടുതുറയിലെ മുത്തശ്ശിയുടെ വീട്ടിലെത്തിയപ്പോഴാണ് അയല്‍വാസിയായ പെണ്‍കുട്ടിയെ പരിചയപ്പെട്ടത്. പരിചയം പതുക്കെ പ്രണയത്തിലേക്കു വഴിമാറി. എന്നാല്‍, ഇയാളുടെ തനിസ്വരൂപം മനസ്സിലാക്കിയതോടെ പെണ്‍കുട്ടി ബന്ധത്തില്‍നിന്ന് പിന്‍മാറി. ഇതോടെ ഭീഷണിയുമായി യുവാവ് രംഗത്തെത്തി. വിവാഹം ചെയ്തു തരണമെന്ന് ആവശ്യപ്പെട്ട് ഇയാള്‍ നിരവധി തവണ പെണ്‍കുട്ടിയുടെ വീട്ടിലെത്തി വഴക്കുണ്ടാക്കി. പെണ്‍കുട്ടിയുടെ മാതാപിതാക്കള്‍ പരാതി നല്‍കിയതോടെ, മേലില്‍ ശല്യം ചെയ്യില്ലെന്ന് എഴുതിനല്‍കിയാണ് വിഘ്‌നേശ്വരന്‍ കേസില്‍നിന്ന് രക്ഷപ്പെട്ടത്. ഇതിനു തൊട്ടുപിന്നാലെയാണ് വീട്ടിലേക്ക് അതിക്രമിച്ചു കയറി പെണ്‍കുട്ടിയെ തട്ടിക്കൊണ്ടു പോയത്. വിഘ്‌നേശ്വരന്റെ ശല്യം രൂക്ഷമായതോടെ പെണ്‍കുട്ടിയുടെ വീട്ടില്‍ സിസിടിവി ക്യാമറകള്‍ സ്ഥാപിച്ചിരുന്നു. സുഹൃത്തുക്കളെയും കൂട്ടിയെത്തിയ യുവാവ് നടത്തിയ 'മിന്നലാക്രമണം' കൃത്യമായി ഈ ക്യാമറയില്‍ പതിഞ്ഞു. അയല്‍വാസികള്‍ അറിയിച്ചതനുസരിച്ച് സ്ഥലത്തെത്തിയ പൊലീസ് ദൃശ്യങ്ങളില്‍നിന്ന് അക്രമികളെ തിരിച്ചറിഞ്ഞു. തുടര്‍ന്ന് രാത്രിയില്‍ത്തന്നെ പല സംഘങ്ങളായി അന്വേഷണം തുടങ്ങി. അക്രമിസംഘത്തില്‍ വിഴുപ്പുറം സ്വദേശികള്‍ ഉണ്ടെന്ന് വിവരം ലഭിച്ചതിനാല്‍ ഒരു സംഘം പൊലീസുകാര്‍ അവിടേക്കു നീങ്ങി. സിനിമാ സ്‌റ്റൈല്‍ ചേസിങ്ങിനു ശേഷം വിഴുപ്പുറം വിക്രപണ്ഡി ചെക്‌പോസ്റ്റിനു സമീപം വച്ച് വിഘ്‌നേശ്വരനും സംഘവും സഞ്ചരിച്ചിരുന്ന വാന്‍ പൊലീസ് തടഞ്ഞു. തുടര്‍ന്ന് പെണ്‍കുട്ടിയെ മോചിപ്പിച്ചു. വാഹനത്തില്‍നിന്ന് ഇറങ്ങിയോടിയ വിഘ്‌നേശ്വരനെയും സുഹൃത്തുക്കളായ സുഭാഷ്, സെല്‍വകുമാര്‍ എന്നിവരെയും പിന്നീട് പൊലീസ് പിടികൂടി. സംഘത്തില്‍പ്പെട്ട മറ്റു പതിനൊന്നു പേര്‍ക്കായി തിരച്ചില്‍ തുടരുകയാണ്.