സജീവന്റെ മരണം; മൂന്ന് പൊലീസ് ഉദ്യോഗസ്ഥര്‍ക്ക് നോട്ടിസ് അയക്കും

വടകര സജീവന്റെ മരണത്തില്‍ എസ് ഐ എം നിജേഷ് ഉള്‍പ്പെടെ മൂന്ന് പൊലീസുകാര്‍ക്ക് നോട്ടിസ് അയക്കാന്‍ അന്വേഷണ സംഘം. മൊഴി എടുക്കാന്‍ അന്വേഷണ സംഘത്തിന് മുമ്പില്‍ ഉടന്‍ ഹാജരാകണമെന്ന് നിര്‍ദേശം നല്‍കി.പോലീസ് സ്റ്റേഷനില്‍ നിന്നും ഹാര്‍ഡ് ഡിസ്‌ക് ഉള്‍പ്പടെ ഉള്ളവ അന്വേഷണസംഘം കസ്റ്റഡിയില്‍ എടുത്തിരുന്നു. ആശുപത്രിയില്‍ എത്തും മുന്‍പ് സജീവന്‍ മരിച്ചിരുന്നുവെന്ന് സജീവനെ ആദ്യം എത്തിച്ച വടകര സഹ. ആശുപത്രിയിലെ ഡോക്ടര്‍ ക്രൈംബ്രാഞ്ച് സംഘത്തിന് മൊഴി നല്‍കിയിട്ടുണ്ട്. സസ്‌പെന്‍ഷനിലുള്ള എസ്.ഐ എം. നിജേഷ്, എഎസ്‌ഐ അരുണ്‍കുമാര്‍, സി.പി.ഒ ഗിരീഷ് എന്നിവരെ ഇത് വരെ അന്വേഷണസംഘത്തിന് ചോദ്യം ചെയ്യാനായിട്ടില്ല. ഇവര്‍ ഒളിവിലാണെന്നാണ് വിവരം. ഹാജരായില്ലെങ്കില്‍ എസ്ഐ ഉള്‍പ്പടെ ഉള്ളവര്‍ക്ക് സിആര്‍പിസി 160 പ്രകാരം നോട്ടീസ് അയക്കാനാണ് നീക്കം. വാഹനം തട്ടിയ കേസുമായി ബന്ധപ്പെട്ടാണ് സജീവനെ വടകര പോലീസ് കസ്റ്റഡിയില്‍ എടുത്തത്. ഈ മാസം 22ന് രാത്രിയാണ് ഇയാളെ പൊലീസ് കസ്റ്റഡിയിലെടുത്തത്. പൊലീസ് ചോദ്യം ചെയ്ത് വിട്ടയച്ച ശേഷം ഇയാള്‍ കുഴഞ്ഞുവീഴുകയായിരുന്നു. വടകര സ്റ്റേഷന്‍ വളപ്പില്‍ തന്നെയാണ് ഇയാള്‍ കുഴഞ്ഞുവീണത്. ഇയാള്‍ വീണുകിടക്കുന്നത് ശ്രദ്ധയില്‍പ്പെട്ട നാട്ടുകാരാണ് സജീവനെ ആശുപത്രിയിലെത്തിച്ചത്. എന്നാല്‍ ആശുപത്രിയിലെത്തുന്നതിന് മുന്‍പ് തന്നെ സജീവന്‍ മരിക്കുകയായിരുന്നു. സജീവന്റെ വാഹനം മറ്റൊരു വാഹനത്തിന്റെ പിന്നില്‍ ഇടിച്ചതുമായി ബന്ധപ്പെട്ട തര്‍ക്കത്തെത്തുടര്‍ന്നാണ് ഇയാളെ കസ്റ്റഡിയിലെടുത്തതെന്ന് വടകര പൊലീസ് പറഞ്ഞു. എന്നാല്‍ സജീവനെ ഉടന്‍ തന്നെ വിട്ടയച്ചെന്നുമാണ് പൊലീസ് പറയുന്നത്. എന്നാല്‍ പൊലീസ് കസ്റ്റഡിയിലെടുത്തയുടന്‍ തനിക്ക് നെഞ്ചുവേദനയെടുക്കുന്നുവെന്ന് സജീവന്‍ തന്നെ പൊലീസിനോട് പല പ്രാവശ്യം പറഞ്ഞിരുന്നെന്ന് സജീവനൊപ്പമുണ്ടായിരുന്ന ആളുകള്‍ പറഞ്ഞു.