വിടാതെ ഇഡി; അര്‍പ്പിതയുടെ വസതിയില്‍നിന്ന് വീണ്ടും 20 കോടിയും സ്വര്‍ണവും പിടിച്ചു

കൊല്‍ക്കത്ത : സ്‌കൂള്‍ നിയമന കുംഭകോണവുമായി ബന്ധപ്പെട്ടു ബംഗാള്‍ മന്ത്രി പാര്‍ഥ ചാറ്റര്‍ജിക്കൊപ്പം അറസ്റ്റിലായ നടി അര്‍പ്പിത മുഖര്‍ജിയുടെ മറ്റൊരു അപ്പാര്‍ട്ട്‌മെന്റില്‍ നിന്ന് എന്‍ഫോഴ്‌സ്‌മെന്റ് ഡയറക്ടറേറ്റ് (ഇഡി) 20 കോടി രൂപ കൂടി പിടിച്ചെടുത്തു. രണ്ട് കോടിയിലധികം രൂപ വിലമതിക്കുന്ന മൂന്നു കിലോ സ്വര്‍ണവും കണ്ടെടുത്തു. അന്വേഷണത്തിന്റെ ഭാഗമായി 15 ഇടങ്ങളില്‍ക്കൂടി ഇഡി ബുധനാഴ്ച പരിശോധന നടത്തി. ഇതില്‍ ബെല്‍ഗാരിയയിലെ അപ്പാര്‍ട്ട്‌മെന്റില്‍ നിന്നാണ് പണം കണ്ടെടുത്തത്. ചില നിര്‍ണായക രേഖകള്‍ കണ്ടെടുത്തതായും റിപ്പോര്‍ട്ടുകളുണ്ട്. കണ്ടെടുത്ത പണം ഇപ്പോഴും ഉദ്യോഗസ്ഥര്‍ എണ്ണിത്തിട്ടപ്പെടുകയാണെന്നാണ് റിപ്പോര്‍ട്ട്. നേരത്തേ, അര്‍പ്പിതയുടെ സൗത്ത് കൊല്‍ക്കത്തയിലെ ആഡംബര ഫ്‌ലാറ്റില്‍ നിന്ന് 21 കോടി രൂപയും ലക്ഷങ്ങളുടെ ആഭരണവും ഇഡി പിടിച്ചെടുത്തിരുന്നു. പാര്‍ഥ ചാറ്റര്‍ജിയെയും അര്‍പ്പിത മുഖര്‍ജിയെയും ശനിയാഴ്ച ഇഡി അറസ്റ്റ് ചെയ്തിരുന്നു. ഇരുവരെയും ഓഗസ്റ്റ് മൂന്നു വരെ ഇഡിയുടെ കസ്റ്റഡിയില്‍ വിട്ടു. അധ്യാപക നിയമന അഴിമതിയുമായി ബന്ധപ്പെട്ട കൈക്കൂലിയാണ് ഈ പണമെന്ന് അര്‍പ്പിത അന്വേഷണ ഉദ്യോഗസ്ഥരോട് പറഞ്ഞതായാണ് റിപ്പോര്‍ട്ട്. 'പണം സൂക്ഷിച്ചിരുന്ന മുറിയില്‍ പാര്‍ഥ ചാറ്റര്‍ജിക്കും കൂട്ടര്‍ക്കും മാത്രമേ പ്രവേശനമുണ്ടായിരുന്നുള്ളൂ. 10 ദിവസത്തിലൊരിക്കല്‍ അവര്‍ വന്നിരുന്നു. പാര്‍ഥ തന്റെയും മറ്റൊരു സ്ത്രീയുടെയും വീട് 'മിനി ബാങ്കാ'യി ഉപയോഗിച്ചു. ആ സ്ത്രീ പാര്‍ഥയുടെ അടുത്ത സുഹൃത്ത് കൂടിയാണ്'- അര്‍പ്പിത മുഖര്‍ജി അന്വേഷണ ഉദ്യോഗസ്ഥരോട് പറഞ്ഞു. ബംഗാള്‍ മുഖ്യമന്ത്രി മമതാ ബാനര്‍ജിയുടെ മന്ത്രിസഭയിലെ ഏറ്റവും മുതിര്‍ന്ന മന്ത്രിയും മമതയുടെ അടുത്ത സഹായിയുമാണ് പാര്‍ഥ ചാറ്റര്‍ജി. വിദ്യാഭ്യാസ മന്ത്രിയായിരിക്കെ ബംഗാള്‍ സ്‌കൂള്‍ സര്‍വീസസ് കമ്മിഷന്‍ വഴി സര്‍ക്കാര്‍ സ്‌കൂളുകളില്‍ അധ്യാപക-അനധ്യാപക തസ്തികകളില്‍ നിയമവിരുദ്ധമായി ജീവനക്കാരെ നിയമിച്ചതില്‍ കൈക്കൂലി വാങ്ങിയെന്നാണ് ആരോപണം.