റിസോര്‍ട്ടിന്റെ മറവില്‍ അനാശാസ്യ കേന്ദ്രം; ബിജെപി മേഘാലയ ഉപാധ്യക്ഷന്‍ യുപിയില്‍ അറസ്റ്റില്‍

ഷില്ലോങ് റിസോര്‍ട്ടിന്റെ മറവില്‍ നടത്തിവന്ന അനാശാസ്യ കേന്ദ്രം പൊലീസ് പൂട്ടിച്ചതിനു പിന്നാലെ ഒളിവില്‍പ്പോയ ബിജെപി നേതാവ് അറസ്റ്റില്‍. മേഘാലയ ബിജെപി ഉപാധ്യക്ഷനായ െബര്‍ണാഡ് എന്‍.മാരകാണ് അറസ്റ്റിലായത്. അനാശാസ്യ കേന്ദ്രം പൊലീസ് പൂട്ടിച്ചതു മുതല്‍ ഒളിവിലായിരുന്ന ഇയാളെ ഉത്തര്‍പ്രദേശിലെ ഹാപുര്‍ ജില്ലയില്‍നിന്നാണ് പിടികൂടിയത്. ഇയാള്‍ക്കെതിരെ കോടതി ജാമ്യമില്ലാ വാറന്റ് പുറപ്പെടുവിച്ചിരുന്നു. ഇതിനു പിന്നാലെ മേഘാലയ പൊലീസ് ലുക്കൗട്ട് നോട്ടിസും പുറപ്പെടുവിച്ചു. ലുക്കൗട്ട് നോട്ടിസ് പുറത്തിറക്കി മണിക്കൂറുകള്‍ക്കകം നേതാവ് അറസ്റ്റിലായി. നേരത്തെ, വെസ്റ്റ് ഗാരോ ഹില്‍സ് ജില്ലയില്‍ ബെര്‍ണാഡിന്റെ ഉടമസ്ഥതയിലുള്ള റിസോര്‍ട്ടില്‍ പൊലീസ് നടത്തിയ റെയ്ഡിലാണ് ഇവിടെ അനാശാസ്യ കേന്ദ്രം പ്രവര്‍ത്തിച്ചിരുന്നതായി കണ്ടെത്തിയത്. കഴിഞ്ഞ വെള്ളിയാഴ്ച വൈകിട്ടും ശനിയാഴ്ച പകലുമായാണ് റെയ്ഡ് നടന്നത്. റിസോര്‍ട്ടില്‍ വൃത്തിഹീനമായ മുറികളില്‍ പൂട്ടിയിട്ട നിലയില്‍ പ്രായപൂര്‍ത്തിയാകാത്ത ആറുപേരെ കണ്ടെത്തിയിരുന്നു. ഇവരെ പൊലീസ് മോചിപ്പിച്ചു. രണ്ടു ദിവസങ്ങളിലായി നടത്തിയ റെയ്ഡില്‍ 73 പേരെ അറസ്റ്റു ചെയ്തു. 47 പുരുഷന്‍മാരെയും 26 സ്ത്രീകളെയുമാണ് അറസ്റ്റ് ചെയ്തത്. റെയ്ഡിനായി എത്തുമ്പോള്‍ ഇവരില്‍ പലരും മദ്യപിച്ച് നഗ്‌നരായ നിലയായിരുന്നുവെന്ന് പൊലീസ് വ്യക്തമാക്കി. വിശദമായ പരിശോധനയില്‍ വലിയ അളവില്‍ മദ്യവും 500ല്‍ അധികം ഗര്‍ഭനിരോധന ഉറകളും മൊബൈല്‍ ഫോണുകളും വിവിധ രേഖകളും പിടിച്ചെടുത്തു. ഗാരോ ഹില്ലിലെ സ്വയംഭരണ ജില്ലാ കൗണ്‍സിലിലെ ജനപ്രതിനിധിയാണ് ബെര്‍ണാഡ്. പോക്‌സോ കേസിലടക്കം പ്രതിയായ ബെര്‍ണാഡ് ഭരണകക്ഷിയായ മേഘാലയ ഡെമോക്രാറ്റിക് അലൈന്‍സുമായി നിരന്തരം വാഗ്വാദങ്ങളില്‍ ഏര്‍പ്പെട്ട് വാര്‍ത്തകളില്‍ ഇടം നേടാറുണ്ട്.