സെക്‌സില്‍ ഏര്‍പ്പെട്ടിട്ട് ഏറെക്കാലമായി; ഗൂഗിള്‍ സഹസ്ഥാപകന്റെ ഭാര്യയുമായി രഹസ്യബന്ധമില്ലെന്ന് ടെസ്ല സി.ഇ.ഒ എലോണ്‍ മസ്‌ക്

ഗൂഗിള്‍ സഹസ്ഥാപകന്‍ സെര്‍ജി ബ്രിനിന്റെ ഭാര്യ നിക്കോളെ ഷാനഹനുമായി തനിക്ക് രഹസ്യബന്ധമുണ്ടെന്ന മാധ്യമ റിപ്പോര്‍ട്ട് ടെസ്ല സി.ഇ.ഒ എലോണ്‍ മസ്‌ക് നിഷേധിച്ചു. ഇതുമായി ബന്ധപ്പെട്ട് ട്വിറ്ററില്‍ പോസ്റ്റ് ചെയ്ത വാര്‍ത്തയ്ക്ക് മറുപടിയായി ഇതെല്ലാം വാസ്തവ വിരുദ്ധമായ കാര്യങ്ങളാണെന്ന് അദ്ദേഹം പ്രതികരിച്ചു. ''ഗൂഗിള്‍ സഹസ്ഥാപകന്‍ സെര്‍ജിയും ഞാനും അടുത്ത സുഹൃത്തുക്കളാണ്, ഇന്നലെ രാത്രി ഒരു പാര്‍ട്ടിയില്‍ ഞങ്ങള്‍ ഒരുമിച്ച് പങ്കെടുത്തിരുന്നു,'' എലോണ്‍ മസ്‌ക് ട്വീറ്റ് ചെയ്തു. മൂന്ന് വര്‍ഷത്തിനിടെ താന്‍ രണ്ട് തവണയാണ് സെര്‍ജിയുടെ ഭാര്യയെ കണ്ടിട്ടുള്ളതെന്നും ആ സമയം നിരവധി പേര്‍ ചുറ്റുമുണ്ടായിരുന്നുവെന്നും എലോണ്‍ മസ്‌ക് വ്യക്തമാക്കി. തനിക്കെതിരെ അപകീര്‍ത്തികരമായ വാര്‍ത്ത നല്‍കിയ പ്രസിദ്ധീകരണം മുമ്പും പല പ്രമുഖരെയും വ്യക്തിഹത്യ നടത്തിയിട്ടുണ്ട്. ആ വാര്‍ത്തകളുമായി ബന്ധപ്പെട്ട് അവരുടെയൊന്നും വിശദീകരണം പ്രസിദ്ധീകരണം നല്‍കിയിട്ടുമില്ലെന്ന് എലോണ്‍ മസ്‌ക് ആരോപിച്ചു. 2021 സെപ്റ്റംബറിലാണ് എലോണ്‍ മസ്‌ക് പങ്കാളിയും ഗായികയുമായ ഗ്രിംസുമായുള്ള ബന്ധം വേര്‍പെടുത്തിയത്. ഈ വേര്‍പിരിയലിന് ശേഷമാണ് ഗൂഗിള്‍ സഹസ്ഥാപകന്‍ സെര്‍ജി ബ്രിനിന്റെ ഭാര്യ നിക്കോളെ ഷാനഹനുമായി എലോണ്‍ മസ്‌ക് ബന്ധം പുലര്‍ത്തിയതെന്നാണ് വാര്‍ത്തയില്‍ പറയുന്നത്. എല്ലാ ആരോപണങ്ങളെയും തള്ളിക്കളഞ്ഞ എലോണ്‍ മസ്‌ക് താന്‍ ലൈം?ഗിക ബന്ധത്തില്‍ ഏര്‍പ്പെട്ടിട്ട് ഏറെ നാളായെന്നും പറഞ്ഞു. അടുത്തിടെ എടുത്തതാണെന്ന് അവകാശപ്പെട്ട് സെര്‍ജി ബ്രിനിനൊപ്പം ഒരു പാര്‍ട്ടിയില്‍ പങ്കെടുത്തതിന്റെ ഫോട്ടോയും അദ്ദേഹം പങ്കുവെച്ചു. എലോണ്‍ മസ്‌കിന്റെ കമ്പനിയായ ന്യൂറലിങ്കിന്റെ എക്സിക്യൂട്ടീവ് ഷിവോണ്‍ സിലിസുമായി അദ്ദേഹത്തിന് രഹസ്യ ബന്ധമുണ്ടെന്ന് പറയുന്ന പല വാര്‍ത്തകളും പുറത്തുവന്നിരുന്നു. 2021 നവംബറില്‍ എലോണ്‍ മസ്‌കിന്റെ ഇരട്ടക്കുട്ടികള്‍ക്ക് ഷിവോണ്‍ സിലി ജന്മം നല്‍കിയെന്നും റിപ്പോര്‍ട്ടുകളില്‍ പറയുന്നു.