ബി.ജെ.പി. സഖ്യം ഉപേക്ഷിക്കാന്‍ എ.ഐ.എ.ഡി.എം.കെ. നീക്കം

ചെന്നൈ: എടപ്പാടി പളനിസ്വാമിയുടെ സമ്പൂര്‍ണ നിയന്ത്രണത്തിലായ എ.ഐ.എ.ഡി.എം.കെ. ബി.ജെ.പി. സഖ്യം ഉപേക്ഷിക്കാനൊരുങ്ങുന്നു. അടുത്ത തിരഞ്ഞെടുപ്പിനുമുമ്പ് സഖ്യം ഉപേക്ഷിച്ച് മതനിരപേക്ഷ മുന്നണിയുടെ ഭാഗമാകുന്നതിനെക്കുറിച്ച് പാര്‍ട്ടി നേതൃത്വം ആലോചന തുടങ്ങിയതായാണ് വിവരം. പളനിസ്വാമിയുടെയും പനീര്‍ശെല്‍വത്തിന്റെയും ഇരട്ട നേതൃത്വത്തിന്‍കീഴിലായിരുന്നപ്പോള്‍ സഖ്യകക്ഷിയായ ബി.ജെ.പി.ക്ക് എ.ഐ.എ.ഡി.എം.കെ.യില്‍ നിര്‍ണായക സ്വാധീനമുണ്ടായിരുന്നു. പളനിസ്വാമിപക്ഷം ബി.ജെ.പി ഇടപെടലില്‍ അസ്വസ്ഥരായിരുന്നു. ഈ അസ്വസ്ഥത ഇടയ്‌ക്കൊക്കെ പ്രസ്താവനകളിലൂടെ പുറത്തുവന്നിരുന്നു. പനീര്‍ശെല്‍വം പാര്‍ട്ടിയില്‍ അപ്രസക്തരായതോടെ ബി.ജെ.പി. ബന്ധം ഉപേക്ഷിക്കണമെന്ന നിലപാടിനും മേല്‍ക്കൈ കിട്ടി. തീവ്രഹിന്ദുത്വ നിലപാടിലേക്കുനീങ്ങുന്ന ബി.ജെ.പി.ക്കൊപ്പംനിന്ന് തമിഴ്നാട് രാഷ്ട്രീയത്തില്‍ നേട്ടമുണ്ടാക്കാന്‍ കഴിയില്ലെന്ന് എ.ഐ.എ.ഡി.എം.കെ. നേതൃത്വം മനസ്സിലാക്കിയിട്ടുണ്ട്. ന്യൂനപക്ഷവോട്ടുകള്‍ കിട്ടിയില്ലെങ്കില്‍ 2024-ലെ ലോക്സഭാ തിരഞ്ഞെടുപ്പിലും 2026-ലെ നിയമസഭാ തിരഞ്ഞെടുപ്പിലും നില മെച്ചപ്പെടില്ലെന്ന് പാര്‍ട്ടി നേതൃത്വം കരുതുന്നു. പാര്‍ട്ടിനേതൃത്വം പിടിച്ചെടുത്തതിനുപിന്നാലെ മുന്‍നിരനേതാക്കളുടെ അനൗപചാരികയോഗംവിളിച്ച് പളനിസ്വാമി ഇക്കാര്യം ചര്‍ച്ചചെയ്തിരുന്നു. ബി.ജെ.പി.യുമായുള്ള ബന്ധം ഉപേക്ഷിക്കണമെന്ന അഭിപ്രായത്തിനാണ് മുന്‍തൂക്കം കിട്ടിയതെന്നാണറിയുന്നത്. രാഷ്ട്രപതി രാംനാഥ് കോവിന്ദിന് യാത്രയയപ്പ് നല്‍കാനുള്ള ചടങ്ങില്‍ പങ്കെടുക്കാന്‍ ഡല്‍ഹിയിലേക്കുപോയ പളനിസ്വാമി നാലുദിവസം അവിടെ തങ്ങി പ്രധാനമന്ത്രി നരേന്ദ്രമോദിയുമായും ആഭ്യന്തരമന്ത്രി അമിത് ഷായുമായും ചര്‍ച്ച നടത്തുമെന്നാണ് നേരത്തേ അറിയിച്ചിരുന്നത്. എന്നാല്‍, സന്ദര്‍ശനം വെട്ടിച്ചുരുക്കി മടങ്ങാന്‍ അദ്ദേഹം തീരുമാനിച്ചിരിക്കയാണ്. ബി.ജെ.പി.യുമായുള്ള ബന്ധം മോശമാകുന്നതിന്റെ സൂചനയായി ഇത് വ്യാഖ്യാനിക്കപ്പെടുന്നുണ്ട്. മുന്നണിമാറ്റത്തിന് മുന്നോടിയായി കോണ്‍ഗ്രസ് നേതൃത്വവുമായി എ.ഐ.എ.ഡി.എം. നേതാക്കള്‍ അനൗപചാരിക ചര്‍ച്ചകള്‍ തുടങ്ങിയതായി റിപ്പോര്‍ട്ടുണ്ട്. സഖ്യകക്ഷിയായ ഡി.എം.കെ.യുടെ വല്യേട്ടന്‍ മനോഭാവത്തില്‍ തമിഴ്നാട്ടിലെ കോണ്‍ഗ്രസ് നേതൃത്വത്തിന് അസംതൃപ്തിയുണ്ട്. എന്നാല്‍, ഡി.എം.കെ. സഖ്യംവിട്ട് കോണ്‍ഗ്രസ് പുറത്തുവരാനുള്ള സാധ്യത കുറവാണ്.