‘രാഷ്ട്രപതിയെ ശ്രദ്ധിക്കാതെ മോദി ക്യാമറയില്‍ നോക്കുന്നു’; വിഡിയോ ഫ്‌ളാഗ് ചെയ്ത് ട്വിറ്റര്‍

ന്യൂഡല്‍ഹിന് രാഷ്ട്രപതി റാംനാഥ് കോവിന്ദ് അഭിവാദ്യം ചെയ്യുമ്പോള്‍ പ്രധാനമന്ത്രി നരേന്ദ്ര മോദി ക്യാമറയില്‍ നോക്കുകയാണെന്ന് സൂചിപ്പിച്ച് ആം ആദ്മി പാര്‍ട്ടി നേതാവ് ട്വീറ്റ് ചെയ്ത വിഡിയോ റെഡ്ഫ്‌ളാഗ് ചെയ്ത് ട്വിറ്റര്‍. വിഡിയോ തെറ്റിദ്ധരിപ്പിക്കുന്നതാണെന്നും സന്ദര്‍ഭത്തിന് അനുയോജ്യമല്ലെന്നും സൂചിപ്പിച്ചാണ് നടപടി. ഞായറാഴ്ച രാവിലെയാണ് എഎപി നേതാവ് സഞ്ജയ് സിങ് വിഡിയോ പോസ്റ്റ് ചെയ്തത്. യഥാര്‍ഥ വിഡിയോയില്‍, രാഷ്ട്രപതി അഭിവാദ്യം ചെയ്യുമ്പോള്‍ പ്രധാനമന്ത്രി കൈകൂപ്പുന്നതും അദ്ദേഹത്തെ നോക്കുന്നതും കാണാം. എന്നാല്‍ സഞ്ജയ് സിങ് ട്വീറ്റ് ചെയ്ത വിഡിയോയില്‍ ഇത് എഡിറ്റ് ചെയ്തിട്ടുണ്ട്. രാഷ്ട്രപതി അഭിവാദ്യം ചെയ്യുമ്പോള്‍ പ്രധാനമന്ത്രി അതു ശ്രദ്ധിക്കാതെ ക്യാമറയില്‍ മാത്രം നോക്കുന്നതായാണ് വിഡിയോ. ശനിയാഴ്ച, പാര്‍ലമെന്റിന്റെ സെന്‍ട്രല്‍ ഹാളില്‍ രാഷ്ട്രപതിക്കു നല്‍കിയ യാത്രയയപ്പിന്റെ വിഡിയോയിലെ ഭാഗമാണ് ഇത്. എഎപി നേതാവിനെതിരെ ബിജെപി നേതാക്കള്‍ ഉള്‍പ്പെടെയുള്ളവര്‍ രംഗത്തെത്തിയിരുന്നു. യഥാര്‍ഥ വിഡിയോ പോസ്റ്റ് ചെയ്യുകയും ചെയ്തു. ഇതിനു പിന്നാലെയാണ് സഞ്ജയ് സിങ്ങിന്റെ വിഡിയോ ട്വിറ്റര്‍ റെഡ് ഫ്‌ളാഗ് ചെയ്തത്.