തൃശൂരില്‍ മദ്യലഹരിയില്‍ മത്സരിച്ച് കാറോടിച്ച് അപകടം; ഒരു മരണം, 4 പേര്‍ക്ക് ഗുരുതര പരുക്ക്

തൃശൂര്‍ മദ്യപിച്ച് കാറോട്ട മത്സരം നടത്തുന്നതിനിടെയുണ്ടായ അപകടത്തില്‍ ടാക്‌സി യാത്രക്കാരന്‍ മരിച്ചു. ടാക്‌സി ഡ്രൈവര്‍ ഉള്‍പ്പെടെ നാലു പേര്‍ക്ക് ഗുരുതരമായി പരുക്കേറ്റു. തൃശൂര്‍ കൊട്ടേക്കാട് ബുധനാഴ്ച രാത്രി 9.30നാണ് അപകടം നടന്നത്. മത്സരയോട്ടത്തിനിടെ കാറുകളിലൊന്ന് ടാക്‌സിയില്‍ ഇടിക്കുകയായിരുന്നു. അപകടമുണ്ടാക്കിയ കാര്‍ ഡ്രൈവറെ പൊലീസ് കസ്റ്റഡിയിലെടുത്തു. ടാക്‌സി കാറിലെ യാത്രക്കാരനാണ് മരിച്ചത്. മരിച്ചയാളുടെ ഭാര്യ, മകള്‍, ടാക്‌സി ഡ്രൈവര്‍ എന്നിവരുള്‍പ്പെടെ 4 പേര്‍ക്കാണ് ഗുരുതരമായി പരുക്കേറ്റത്. രണ്ട് കാറുകള്‍ ദീര്‍ഘദൂര മത്സരയോട്ടം നടത്തുകയായിരുന്നുവെന്ന് നാട്ടുകാര്‍ പറഞ്ഞു. അപകടമുണ്ടാക്കിയ കാറിലെ ഡ്രൈവര്‍ മദ്യപിച്ചിരുന്നതായി വൈദ്യപരിശോധനയില്‍ തെളിഞ്ഞു. സംഭവ സ്ഥലത്ത് തടിച്ചുകൂടിയ ടാക്‌സി ഡ്രൈവര്‍മാര്‍ കുറ്റക്കാര്‍ക്കെതിരെ നടപടി സ്വീകരിക്കണമെന്ന് ആവശ്യപ്പെട്ടു.