വാങ്ങിയ സ്വര്‍ണത്തിന് യുവതി പണം നല്‍കി, അഡ്വാന്‍സും കൊടുത്തു;ഒപ്പം രണ്ട് മാലയും അടിച്ചുകൊണ്ട്പോയി

മൂന്നാര്‍: മലേഷ്യക്കാരിയെന്ന് പരിചയപ്പെടുത്തി സ്വര്‍ണം വാങ്ങാനെത്തിയ യുവതി സ്വര്‍ണാഭരണങ്ങള്‍ മോഷ്ടിച്ചുകടന്നു.മൂന്നാര്‍ ടൗണിനുസമീപം ജി.എച്ച്.റോഡില്‍ പ്രവര്‍ത്തിക്കുന ജൂവലറിയില്‍നിന്നാണ് 38 ഗ്രാം തൂക്കം വരുന്ന രണ്ട് സ്വര്‍ണമാലകളുമായി യുവതി കടന്നത്. കഴിഞ്ഞ ദിവസം രാവിലെയാണ് സംഭവം. കോയമ്പത്തൂരില്‍ ജനിച്ചുവളര്‍ന്നതും നിലവില്‍ മലേഷ്യയില്‍ സ്ഥിരതാമസമാക്കിയതെന്നും രേഷ്മയെന്നാണ് പേരെന്നും സ്വയം പരിചയപ്പെടുത്തിയാണ് 40 വയസ്സ് തോന്നിക്കുന്ന യുവതി രാവിലെ പത്തരയോടെ കടയിലെത്തിയത്. കടയില്‍നിന്ന് മൂന്ന് ജോഡി കമ്മലും ഒരു കൈച്ചെയിനും വാങ്ങിയ യുവതി പണം നല്‍കിയ ശേഷം അഞ്ച് പവന്‍ തൂക്കംവരുന്ന മറ്റൊരു മാല, വൈകീട്ട് ഭര്‍ത്താവുമൊത്ത് വന്ന് വാങ്ങാമെന്ന് പറഞ്ഞ് അഡ്വാന്‍സും നല്‍കിയ ശേഷം പോയി. രാത്രിയില്‍ കടയിലെ സ്റ്റോക്ക് പരിശോധിച്ചപ്പോഴാണ് രണ്ട് മാലകള്‍ കുറവുള്ളതായി കണ്ടെത്തിയത്. തുടര്‍ന്ന് കടയിലെ സി.സി.ടി.വി.ദൃശ്യങ്ങള്‍ പരിശോധിച്ചപ്പോഴാണ് കടയിലെ ജീവനക്കാരുടെ ശ്രദ്ധ മാറുന്ന സമയത്ത് മാലകള്‍ അതിവിദഗ്ധമായി കൈയിലിരുന്ന ബാഗില്‍ ഇടുന്നത് കണ്ടെത്തിയത്. സി.സി.ടി.വി.ദൃശ്യങ്ങളടക്കം കടയുടമ മൂന്നാര്‍ പോലീസില്‍ പരാതി നല്‍കി.