മകളുടെ കാമുകനായ പത്താം ക്ലാസുകാരന്റെ ചെവി മുറിച്ചയാള്‍ അറസ്റ്റില്‍

മകളുടെ കാമുകനായ പത്താം ക്ലാസുകാരനെ മര്‍ദ്ദിച്ച് ചെവി മുറിച്ചയാള്‍ പിടിയില്‍. അസമിലെ ടിന്‍സുകിയയിലാണ് സംഭവം. ആണ്‍കുട്ടിയുടെ മാതാവ് നല്‍കിയ പരാതിയിലാണ് അറസ്റ്റ്. പെണ്‍കുട്ടിയുടെ പിതാവ് കൗമാരക്കാരനെ കെട്ടിയിട്ട് മര്‍ദ്ദിക്കുകയും ഇരു ചെവികളും മുറിച്ചെടുക്കുകയുമായിരുന്നു. പ്രായപൂര്‍ത്തിയാവാത്ത മകളും 10ആം ക്ലാസുകാരനുമായുള്ള പ്രണയബന്ധത്തെ പെണ്‍കുട്ടിയുടെ പിതാവ് എതിര്‍ത്തിരുന്നു. ഇതിനിടെ തന്റെ വീട്ടില്‍ കൗമാരക്കാരന്‍ മകളെ സന്ദര്‍ശിക്കാനെത്തിയത് ഇയാള്‍ കണ്ടു. തുടര്‍ന്ന് ആണ്‍കുട്ടിയുടെ കയ്യും കാലും കെട്ടിയിട്ട ഇയാള്‍ കുട്ടിയെ ക്രൂരമായി മര്‍ദ്ദിച്ച് ചെവി മുറിയ്ക്കുകയായിരുന്നു. മോഷ്ടിക്കാനെത്തിയ ആളെന്ന അവകാശവാദവുമായി ഇയാള്‍ തന്നെയാണ് പൊലീസിനെ അറിയിച്ചത്. എന്നാല്‍, കുട്ടിയെ പൊലീസ് ചോദ്യം ചെയ്തപ്പോള്‍ സത്യം പുറത്തറിയുകയായിരുന്നു. തുടര്‍ന്നായിരുന്നു അറസ്റ്റ്. കുട്ടിയുടെ ചെവി ഡോക്ടര്‍മാര്‍ തിരികെ തുന്നിച്ചേര്‍ത്തു.