ബെംഗളൂരുവില്‍ മലയാളി യുവാവിനെ കുത്തിക്കൊന്ന സംഭവം: പ്രതികളെ തിരിച്ചറിയാന്‍ കഴിയാതെ പോലീസ്

ബെംഗളൂരു: ബെംഗളൂരുവില്‍ മലയാളിയുവാവിനെ കുത്തിക്കൊലപ്പെടുത്തിയവരെ പോലീസിന് ഇനിയും തിരിച്ചറിയാനായില്ല. കാസര്‍കോട് രാജപുരം പൈനിക്കര ചേരുവേലില്‍ സനു തോംസണ്‍(30)കൊല്ലപ്പെട്ട കേസില്‍ പ്രതികളെ കണ്ടെത്താന്‍ ബെംഗളൂരു പോലീസ് അന്വേഷണം തുടരുകയാണ്. സൗത്ത് ബെംഗളൂരുവിലെ ജിഗനിയില്‍ വ്യാഴാഴ്ച രാത്രി 10.45-ഓടെയായിരുന്നു ബൈക്കിലെത്തിയ മൂന്നംഗസംഘം സനുവിനെ കുത്തിക്കൊലപ്പെടുത്തിയത്. ജിഗിനി പോലീസാണ് കേസന്വേഷണ ചുമതല. ആക്രമണത്തിന്റെ ദൃശ്യം സമീപത്തെ സി.സി.ടി.വി. ക്യാമറയില്‍നിന്ന് വ്യാഴാഴ്ച പോലീസ് ശേഖരിച്ചിരുന്നു. ജിഗനിയിലെ ടാറ്റ അഡ്വാന്‍സ് സിസ്റ്റംസ് ലിമിറ്റഡ് എന്ന കമ്പനിയിലെ ഉദ്യോഗസ്ഥനായ സനു തോംസണ്‍ രാത്രി ജോലി കഴിഞ്ഞ് കമ്പനിയില്‍നിന്ന് ഇറങ്ങി സമീപത്തുള്ള താമസസ്ഥലത്തേക്ക് നടന്നുപോകുമ്പോഴാണ് അക്രമണത്തിനിരയായത്.ആളുമാറി നടന്ന കൊലപാതകമാണെന്നാണ് സംശയം. ക്വട്ടേഷന്‍ സംഘമാണോയെന്നും അന്വേഷിക്കുന്നു.