പരിശീലനത്തിനിടെ അപമാനിച്ചെന്ന് വനിതാ കായികതാരം; സ്റ്റേഡിയത്തില്‍ കുത്തിയിരുന്ന് പ്രതിഷേധം

പാലാ : നഗരസഭാ സ്റ്റേഡിയത്തില്‍ പരിശീലനം നടത്തുന്നതിനിടെ അപമാനിച്ചയാള്‍ക്കെതിരേ നടപടിയെടുക്കണമെന്നാവശ്യപ്പെട്ട് ഏഷ്യന്‍ ഗെയിംസ് താരം നീനയുടെ പ്രതിഷേധം. ജക്കാര്‍ത്തയില്‍ നടന്ന ഏഷ്യന്‍ ഗെയിംസിലെ ലോങ്ജമ്പ് വെള്ളിമെഡല്‍ ജേത്രിയാണ് നീന. തിങ്കളാഴ്ച വൈകീട്ട് ആറരയ്ക്ക് സിന്തറ്റിക് ട്രാക്ക് സ്റ്റേഡിയത്തിലാണ് സംഭവം. വിവരമറിഞ്ഞ് പോലീസ് എത്തിയെങ്കിലും പരാതി നല്‍കിയാല്‍ വേണ്ടതുചെയ്യാമെന്ന് പറഞ്ഞ് മടങ്ങിയെന്നും നീന പരാതിപ്പെട്ടു. ഇതില്‍ പ്രതിഷേധിച്ചാണ് നീനയും ഭര്‍ത്താവ് പിഴക് അമ്പലത്തിങ്കല്‍ പിന്റോ മാത്യുവും സ്റ്റേഡിയത്തിനുള്ളില്‍ പ്രതിഷേധിച്ചത്. സംഭവമറിഞ്ഞ് നഗരസഭാ ചെയര്‍മാനും അധികൃതരും കായികതാരങ്ങളും സ്റ്റേഡിയത്തിലെത്തി. പാലാ സി.ഐ. കെ.പി.തോംസണ്‍ സ്ഥലത്തെത്തി മൊഴി രേഖപ്പെടുത്തുകയും പ്രതികള്‍ക്കെതിരേ കര്‍ശന നടപടിയെടുക്കുമെന്ന് ഉറപ്പും നല്‍കിയതോടെയാണ് പ്രതിഷേധം അവസാനിപ്പിച്ചത്. സിന്തറ്റിക് ട്രാക്കിലെ ആറ്, ഏഴ്, എട്ട് ട്രാക്കുകളാണ് നടപ്പുകാര്‍ക്കായി നഗരസഭ അനുവദിച്ചിരിക്കുന്നത്. മറ്റ് ട്രാക്കുകള്‍ പരിശീലന താരങ്ങള്‍ക്കായി അനുവദിച്ചിരിക്കുന്നതാണ്. കായികതാരങ്ങളുടെ ട്രാക്കിലൂടെ നടന്ന രണ്ടുപേരോട് മാറി നടക്കാന്‍ ആവശ്യപ്പെട്ടപ്പോള്‍ അവര്‍ അശ്ലീലവാക്കുകളും അസഭ്യവും പറഞ്ഞതെന്ന് നീനയും പിന്റോയും പറഞ്ഞു. നീന കോഴിക്കോട് സ്വദേശിനിയാണ്. ഇവര്‍ പാലായിലെ സ്റ്റേഡിയത്തിലാണ് പരിശീലനം നടത്തുന്നത്. പിന്റോ മാത്യു ഹര്‍ഡില്‍സില്‍ ദേശീയ താരമാണ്. ഇരുവരും കോട്ടയത്ത് റെയില്‍വേയില്‍ ടി.ടി.ഇ.മാരാണ്.