മഹിളാമോര്‍ച്ച നേതാവിന്റെ മരണം: ആരോപണം തള്ളി ബിജെപി ജില്ലാ നേതൃത്വം

പാലക്കാട്: മഹിളാമോര്‍ച്ച പാലക്കാട് മണ്ഡലം ട്രഷര്‍ ശരണ്യയുടെ മരണവുമായി ബന്ധപ്പെട്ട ആരോപണത്തില്‍ വിശദീകരണവുമായി ബിജെപി ജില്ലാ നേതൃത്വം. ശരണ്യയുടെ ആത്മഹത്യാ കുറിപ്പില്‍ പറയുന്ന പ്രജീവ് എന്നയാള്‍ ബിജെപിയുടെ ബൂത്ത് പ്രസിഡന്റ് ആണെന്നുള്ള വാര്‍ത്തകള്‍ അടിസ്ഥാനരഹിതമാണെന്ന് ജില്ലാ അധ്യക്ഷന്‍ കെ.എം.ഹരിദാസ് പറഞ്ഞു. ഇയാള്‍ക്കു പാര്‍ട്ടിയുടെ ഒരു ചുമതലയും ഇല്ല. മാത്രമല്ല റെയില്‍വേ ജീവനക്കാരനായ പ്രജീവ്, റെയില്‍വേ യൂണിയന്‍ ഭാരവാഹിയാണ് എന്നാണ് മനസ്സിലാക്കുന്നതെന്നും ഹരിദാസ് പറഞ്ഞു. ബിജെപി പ്രവര്‍ത്തകന്‍ പ്രജീവ് കാരണമാണ് ജീവനൊടുക്കുന്നതെന്നാണ് ശരണ്യ ആത്മഹത്യാകുറിപ്പില്‍ പറയുന്നത്. പ്രജീവ് തന്നെ ഉപയോഗപ്പെടുത്തിയെന്നും കുറ്റക്കാരി ആക്കിയെന്നും ഇതാണ് ജീവനൊടുക്കാന്‍ കാരണമെന്നും ശരണ്യ ആത്മഹത്യാ കുറിപ്പില്‍ എഴുതിവച്ചിട്ടുണ്ട്. പ്രജീവിന് പല സ്ത്രീകളുമായും ബന്ധമുണ്ടെന്നും വിവരങ്ങള്‍ തന്റെ ഫോണിലുണ്ടെന്നും ശരണ്യ പറയുന്നു. അഞ്ച് പേജുള്ള ആത്മഹത്യാ കുറിപ്പ് പൊലീസ് കസ്റ്റഡിയിലെടുത്തിട്ടുണ്ട്. ഞായറാഴ്ച വൈകിട്ട് 4നാണ് സിഎന്‍ പുരം നടുവക്കാട്ടുപാളയത്ത് രമേഷിന്റെ ഭാര്യ ശരണ്യ (27)യെ മാട്ടുമന്തയിലെ വാടക വീടിനുള്ളില്‍ തൂങ്ങി മരിച്ചനിലയില്‍ കണ്ടെത്തിയത്. പാലക്കാട് നോര്‍ത്ത് പൊലീസാണ് കേസ് അന്വേഷിക്കുന്നത്.