ഷിന്‍സോ ആബെയുടെ കൊലപാതകം: സുരക്ഷാ പിഴവുണ്ടായെന്ന് ജപ്പാന്‍ പൊലീസ്

കൊല്ലപ്പെട്ട മുന്‍ പ്രധാനമന്ത്രി ഷിന്‍സോ ആബെയുടെ സുരക്ഷയില്‍ വീഴ്ച പറ്റിയതായി ജാപ്പനീസ് പൊലീസ്. ആരോപണം നിഷേധിക്കാനാവില്ലെന്ന് നാര പൊലീസ് മേധാവി ടോമോക്കി ഒനിസുക്ക പറഞ്ഞു. വെള്ളിയാഴ്ച ജപ്പാനിലെ ഒരു ക്യാമ്പയിന്‍ സമാപനത്തില്‍ സംസാരിക്കുന്നതിനിടെയാണ്, പ്രധാനമന്ത്രി പഥത്തില്‍ ഏറ്റവുമധികം കാലമിരുന്ന ഷിന്‍സോ ആബെയ്ക്ക് വെടിയേറ്റത്. തെത്സുയ യമഗാമി(41) എന്ന പ്രതിക്ക് ഒരു മതസംഘടനയോട് പകയുണ്ട്. നാടന്‍ തോക്ക് ഉപയോഗിച്ചാണ് അബെയെ വെടിവെച്ചതെന്ന് പ്രതി സമ്മതിച്ചു. പ്രതി പടിഞ്ഞാറന്‍ ജപ്പാനിലെ ഒരു ഫാക്ടറിയില്‍ ജോലി ചെയ്തിരുന്നു. കൂടാതെ ജപ്പാന്റെ നാവികസേനയായ മാരിടൈം സെല്‍ഫ് ഡിഫന്‍സ് ഫോഴ്സില്‍ മൂന്ന് വര്‍ഷത്തോളം സേവനമനുഷ്ഠിച്ചിട്ടുണ്ടെന്നും മൊഴി നല്‍കി. എന്താണ് സംഭവിച്ചതെന്ന് വ്യക്തമാക്കാന്‍ സമഗ്രമായ അന്വേഷണം നടക്കുകയാണെന്നും ഒനിസുക്ക അറിയിച്ചു. അതേസമയം ഞായറാഴ്ച ഉപരിസഭയിലേക്കുള്ള തെരഞ്ഞെടുപ്പ് മുന്‍കൂട്ടി നിശ്ചയിച്ചതുപോലെ നടന്നു. എല്‍ഡിപി ടോക്കിയോ ആസ്ഥാനത്ത് അബെയ്ക്കായി ഒരു നിമിഷം മൗനം ആചരിച്ചു. പ്രാദേശിക സമയം 7ന് ആരംഭിച്ച വോട്ടിംഗ്, 9 മണിയോടെ പൂര്‍ത്തിയായി. ഭരണകക്ഷിയായ ലിബറല്‍ ഡെമോക്രാറ്റിക് പാര്‍ട്ടി (എല്‍ഡിപി) ഭൂരിപക്ഷം നിലനിര്‍ത്തുമെന്ന് എക്സിറ്റ് പോള്‍ ഫലങ്ങള്‍ സൂചിപ്പിക്കുന്നു. ജപ്പാന്‍ പാര്‍ലമെന്റിന്റെ ഉപരിസഭയിലേക്കുള്ള തെരഞ്ഞെടുപ്പുകള്‍ സാധാരണഗതിയില്‍ നിലവിലെ ഗവണ്‍മെന്റിന്റെ ഹിതപരിശോധനയായാണ് കാണുന്നത്. എല്‍ഡിപിയുടെ വലിയ വിജയം നിലവിലെ പ്രധാനമന്ത്രിയുടെ നയങ്ങളെ ശക്തിപ്പെടുത്തും.