കര്‍ണാടകയില്‍ കനത്ത മഴ; മംഗലാപുരത്ത് ഉരുള്‍പ്പൊട്ടലില്‍ 3 മലയാളികള്‍ മരിച്ചു

മംഗലാപുരം പഞ്ചക്കല്ലുവില്‍ ഉരുള്‍പ്പൊട്ടലില്‍ മൂന്ന് മലയാളികള്‍ മരിച്ചു. പാലക്കാട് സ്വദേശി ബിജു, ആലപ്പുഴ സ്വദേശി സന്തോഷ്, കോട്ടയം സ്വദേശി ബാബു എന്നിവരാണ് മരിച്ചത്. പരുക്കേറ്റ കണ്ണൂര്‍ സ്വദേശി ജോണിയെ ആശുപത്രിയില്‍ പ്രവേശിപ്പിച്ചു. റബര്‍ ടാപ്പിങ് തൊഴിലാളികളാണ് അപകടത്തില്‍പ്പെട്ടത്. കനത്ത മഴയെ തുടര്‍ന്ന് തീരദേശ കര്‍ണാടക ജില്ലകളില്‍ കേന്ദ്ര കാലാവസ്ഥാ വകുപ്പ് റെഡ് അലര്‍ട്ട് പ്രഖ്യാപിച്ചു. ദക്ഷിണ കന്നഡ, ഉഡുപ്പി ജില്ലകളില്‍ റെഡ് അലര്‍ട്ട് പ്രഖ്യാപിച്ചതിനെ തുടര്‍ന്ന് ഇരു ജില്ലകളിലെയും സ്‌കൂളുകള്‍ക്കും കോളജുകള്‍ക്കും ഇന്നും അവധി പ്രഖ്യാപിച്ചു. കനത്ത മഴയില്‍ കര്‍ണാടകയിലെ തീരപ്രദേശങ്ങളിലും മലനാട് മേഖലയിലും ജനജീവിതം താറുമാറായി. മഴക്കെടുതിയില്‍ നിരവധി വീടുകള്‍ക്കും കെട്ടിടങ്ങള്‍ക്കും നാശനഷ്ടമുണ്ടായി. വൈദ്യുത പോസ്റ്റുകള്‍ തകര്‍ന്നു. നദികള്‍ കരകവിഞ്ഞൊഴുകിയതിനെ തുടര്‍ന്ന് കൃഷിയിടങ്ങളും താഴ്ന്ന പ്രദേശങ്ങളും വെള്ളത്തിനടിയിലായി. കഴിഞ്ഞ ദിവസം മൂടബിദ്രി എംഐടിഇ എന്‍ജിനീയറിങ് കോളജിന്റെ മതില്‍ ഇടിഞ്ഞുവീണു 3 കാറുകള്‍ തകര്‍ന്നു. രക്ഷാപ്രവര്‍ത്തനങ്ങള്‍ക്കായി എസ്ഡിആര്‍എഫിനെയും എന്‍ഡിആര്‍എഫിനെയും വിന്യസിക്കാന്‍ മുഖ്യമന്ത്രി ബസവരാജ് ബൊമ്മൈ നിര്‍ദേശം നല്‍കി.