ഷമ്മി തിലകനെതിരായ നടപടി അടുത്ത അമ്മ എക്സിക്യൂട്ടിവില്‍ കൈക്കൊള്ളും : ബാബു രാജ്

ഷമ്മി തിലകനെതിരെയുള്ള നടപടി അടുത്ത അമ്മ എക്സിക്യൂട്ടിവില്‍ കൈക്കൊള്ളുമെന്ന് എക്സിക്യൂട്ടിവ് മെമ്പര്‍ ബാബുരാജ്. ഇടവേള ബാബുവിനെതിരായ ഗണേഷ് കുമാറിന്റെ ആരോപണത്തിനും രേഖാമൂലം മറുപടി നല്‍കുമെന്നും ബാബുരാജ് വ്യക്തമാക്കി. അമ്മ യോഗത്തിന്റെ ദൃശ്യങ്ങള്‍ ഫോണില്‍ പകര്‍ത്തി പ്രചരിപ്പിച്ച സംഭവത്തിലാണ് ഷമ്മി തിലകനെതിരെ നടപടിയെടുക്കുക. അമ്മയുടെ പ്രവര്‍ത്തനത്തില്‍ അതൃപ്തി രേഖപെടുത്തിയ ഗണേഷ് കുമാര്‍ ഒന്‍പത് ചോദ്യങ്ങളടങ്ങിയ കത്ത് മോഹന്‍ലാലിന് നല്‍കിരുന്നു. ഇക്കാര്യത്തിലും അടുത്ത അമ്മ എക്സിക്യൂട്ടിവില്‍ തീരുമാനമുണ്ടാകുമെന്ന് ബാബുരാജ് പറഞ്ഞു. കഴിഞ്ഞ ദിവസം മുകേഷിനെതിരെ ഷമ്മി തിലകന്‍ ഗുരുതുര ആരോപണങ്ങളുമായി രംഗത്ത് വന്നിരുന്നു.വിനയന്റെ സിനിമ വേണ്ടെന്നുവച്ചതിന് കാരണം നടന്മാരായ മുകേഷും ഇന്നസെന്റും ഭീഷണിപ്പെടുത്തിയത് കാരണമെന്ന് തുറഞ്ഞ് പറഞ്ഞ് നടന്‍ ഷമ്മി തിലകന്‍. ഇന്നലെ കെ.ബി ഗണേശ് കുമാര്‍ ഉന്നയിച്ച ആരോപണങ്ങള്‍ക്ക് മറുപടി പറയുകയായിരുന്നു ഷമ്മി തിലകന്‍. കെ.ബി ഗണേഷ് കുമാറിന്റെ ചില പ്രസ്താവനകള്‍ അസംബന്ധമെന്ന് ഷമ്മി തിലകന്‍ പറഞ്ഞു. തന്നെ കൊണ്ട് നാട്ടുകാര്‍ക്ക് ശല്യമെന്ന് പറഞ്ഞത് എന്ത് അടിസ്ഥാനത്തിലാണെന്ന് ഷമ്മി തിലകന്‍ ചോദിക്കുന്നു. ഗണേശിന്റെ ബന്ധുവായ ഡിവൈഎസ്പി തനിക്കെതിരെ കള്ളക്കേസ് എടുത്തുവെന്നും ഷമ്മി ആരോപിച്ചിരുന്നു.