മകനൊപ്പം കഴിഞ്ഞ അമ്മയുടെ മരണത്തില്‍ ദുരൂഹതയെന്ന് പരാതി; ഏഴ് മാസങ്ങള്‍ക്ക് ശേഷം മൃതദേഹം പുറത്തെടുത്തു

എരുമേലി: എണ്‍പത്തിമൂന്നുകാരിയായ അമ്മ മരിച്ച സംഭവത്തില്‍ പരാതിയുമായി മകള്‍. അടക്കംചെയ്ത മൃതദേഹം ഏഴ് മാസങ്ങള്‍ക്ക് ശേഷം പുറത്തെടുത്ത് പരിശോധന. എരുമേലി പഞ്ചായത്തിലെ മുട്ടപ്പള്ളിയിലാണ് സംഭവം. മുട്ടപ്പള്ളി കുളത്തുങ്കല്‍ മാര്‍ത്താ മോശ(83)യാണ് കഴിഞ്ഞ നവംബറില്‍ മരിച്ചത്. വീടിനുള്ളില്‍ തീകായുന്നതിനിടെ പൊള്ളലേല്‍ക്കുകയും കാഞ്ഞിരപ്പള്ളി ജനറല്‍ ആശുപത്രിയില്‍ പ്രവേശിപ്പിക്കുകയുമായിരുന്നു. ചികിത്സ കഴിഞ്ഞ് വീട്ടിലെത്തിയ ശേഷമാണ് മരണം സംഭവിക്കുന്നതും മുട്ടപ്പള്ളി സി.എം.എസ്. പള്ളി സെമിത്തേരിയില്‍ അടക്കംചെയ്തതും. മരണത്തില്‍ ദുരൂഹത ആരോപിച്ച് മകള്‍ ബേബിക്കുട്ടി ജില്ലാ പോലീസ് സൂപ്രണ്ടിന് നല്‍കിയ പരാതിയിലാണ് തുടരന്വേഷണം. കാഞ്ഞിരപ്പള്ളി ഡിവൈ.എസ്.പി. എന്‍.ബാബുക്കുട്ടന്‍, തഹസില്‍ദാര്‍ കെ.എം. ജോസുകുട്ടി, എസ്.ഐ. എം.എസ്.അനീഷ് എന്നിവരുടെ മേല്‍നോട്ടത്തിലാണ് മൃതദേഹം പുറത്തെടുത്തത്. ഫൊറന്‍സിക് സര്‍ജന്‍മാരായ ഡോ. സന്തോഷ് ജോയി, ഡോ. വിനു എന്നിവര്‍ മൃതദേഹം പരിശോധിച്ച് സാമ്പിളുകള്‍ ശേഖരിച്ചു. പരേത താമസിച്ചിരുന്ന വീട്ടിലും ശാസ്ത്രീയ പരിശോധന നടത്തി. ശേഖരിച്ച സാമ്പിളുകള്‍ ഫൊറന്‍സിക് ലാബില്‍ പരിശോധിച്ച ശേഷമേ വിവരങ്ങള്‍ വ്യക്തമാകൂ. പരിശോധനകള്‍ക്ക് ശേഷം മൃതദേഹം അടക്കംചെയ്തു. നാല് പെണ്ണും ഒരാണും ഉള്‍പ്പെടുന്നതാണ് മാര്‍ത്താ മോശയുടെ കുടുംബം. എട്ട് വര്‍ഷം മുമ്പ് ഭര്‍ത്താവ് മരിച്ചു. മുട്ടപ്പള്ളിയില്‍ മകനൊപ്പമായിരുന്നു താമസം. പെണ്‍കുട്ടികളെ വിവാഹം ചെയ്തയച്ചു. മകന്റെ കുടുംബത്തിനൊപ്പം കഴിഞ്ഞ അമ്മയുടെ മരണത്തില്‍ ദുരൂഹത ആരോപിച്ച് മകള്‍ നല്‍കിയ പരാതിയിലാണ് നടപടി. ഡിവൈ.എസ്.പി. എന്‍.ബാബുക്കുട്ടനാണ് അന്വേഷണചുമതല.