ഉപ്പള സ്വദേശികള്‍ ബാഗ് തന്നുവിട്ടു, ഡോളറെന്ന് അറിഞ്ഞില്ല; ജീവന് ഭീഷണി: അന്‍സാരി

പ്രവാസി യുവാവിന്റെ കൊലപാതകത്തിലേക്കു നയിച്ച സാമ്പത്തിക ഇടപാടുകളെ സംബന്ധിച്ചുള്ള വെളിപ്പെടുത്തലുകളുമായി കൊല്ലപ്പെട്ട അബൂബക്കര്‍ സിദ്ദിഖിന്റെ സുഹൃത്ത് അന്‍സാരി. താന്‍ ഗള്‍ഫിലേക്ക് പോകുന്ന സമയം മഞ്ചേശ്വരം- ഉപ്പള സ്വദേശികളായ രണ്ടു പേര്‍ ഒരു ബാഗ് തന്നുവിട്ടെന്നും അതില്‍ ഡോളറുകളുള്ള വിവരം തനിക്ക് അറിയില്ലായിരുന്നുവെന്നും അന്‍സാരി പറഞ്ഞു. തന്റെ ജീവന് ഇപ്പോഴും ഭീഷണിയുണ്ടെന്ന ആശങ്കയും അദ്ദേഹം പങ്കുവച്ചു. അന്‍സാരിയേയും കൊല്ലപ്പെട്ട സിദ്ദിഖിന്റെ സഹോദരനെയുമാണ് അദ്യം തട്ടിക്കൊണ്ടുപോയത്. തുടര്‍ന്നാണ് സിദ്ദിഖിനെ വിളിച്ചുവരുത്തി തട്ടിക്കൊണ്ടുപോയി കൊലപ്പെടുത്തിയത്. ദുബായിലേക്കുള്ള ഡോളര്‍ കടത്തുമായി ബന്ധപ്പെട്ട തര്‍ക്കത്തെ തുടര്‍ന്ന് പുത്തിഗെ മുഗുറോഡ് നസീമ മന്‍സിലിലെ അബൂബക്കര്‍ സിദ്ദീഖിനെ (31) തട്ടിക്കൊണ്ടു പോയി കൊലപ്പെടുത്തി ആശുപത്രിയില്‍ ഉപേക്ഷിച്ച കേസില്‍ പ്രതികളായ 2 പേരെ പൊലീസ് അറസ്റ്റ് ചെയ്തിരുന്നു. മഞ്ചേശ്വരം ഉദ്യാവര്‍ ജെഎം റോഡിലെ അബ്ദുല്‍ അസീസ് (36), റൗഫ് റഹീം മന്‍സിലിലെ അബ്ദുല്‍ റഹീം (41) എന്നിവരെയാണ് ജില്ലാ പൊലീസ് മേധാവി ഡോ.വൈഭവ് സക്‌സേന, ഡിവൈഎസ്പിമാരായ പി.ബാലകൃഷ്ണന്‍ നായര്‍, യു.പ്രേമന്‍ എന്നിവരുടെ നേതൃത്വത്തിലുള്ള സംഘം അറസ്റ്റ് ചെയ്തത്. ഇവരെ കൂടാതെ 3 പേര്‍ കസ്റ്റഡിയിലുണ്ട്. നിലവില്‍ 15 പേരെയാണു പൊലീസ് പ്രതി ചേര്‍ത്തത്. ഇതില്‍ 2 പേരെയാണ് അറസ്റ്റ് ചെയ്തത്. ബാക്കി പ്രതികളെ തിരിച്ചറിഞ്ഞിട്ടുണ്ട്. 2 പേര്‍ വിദേശത്തേക്കു കടന്നുവെന്നു പറയുന്നുവെങ്കിലും പൊലീസ് സ്ഥിരീകരിച്ചില്ല. പ്രതികള്‍ക്കായി അന്വേഷണം ഊര്‍ജിതമാക്കി. 5 വാഹനങ്ങളും പൊലീസ് കസ്റ്റഡിയിലെടുത്തിട്ടുണ്ട്.