പന്ത്രണ്ടു വയസുകാരിക്ക് മുന്‍പില്‍ നഗ്‌നത പ്രദര്‍ശനം; യുവാവ് അറസ്റ്റില്‍

മുണ്ടക്കയം: കോട്ടയം മുണ്ടക്കയത്ത് പന്ത്രണ്ടു വയസുകാരിക്ക് മുന്‍പില്‍ നഗ്‌നത പ്രദര്‍ശനം നടത്തിയ യുവാവിനെ അറസ്റ്റ് ചെയ്തു. കൊടികുത്തി സ്വദേശി സുനീഷ് സുരേന്ദ്രനെയാണ് മുണ്ടക്കയം പൊലീസ് ഷൈന്‍ കുമാര്‍ അറസ്റ്റ് ചെയ്തത്. ചൊവ്വാഴ്ച ഉച്ചകഴിഞ്ഞ് വേലനിലം ജംഗ്ഷനു സമീപം തൊമ്മന്‍ റോഡിലായിരുന്നു സംഭവം. സ്വകാര്യ മൊബൈല്‍ കമ്പനിയുടെ ടെക്‌നീഷ്യനായ സുനീഷ് സമീപത്തെ ടവറിനടുത്ത് പോയ ശേഷം തിരികെ മടങ്ങുന്നതിനിടയിലാണ് പെണ്‍കുട്ടിയുടെ മുന്നില്‍ മോശം പെരുമാറ്റം നടത്തിയത്. കടയില്‍ പോയി മടങ്ങുകയായിരുന്ന പെണ്‍കുട്ടിയെ കണ്ടതോടെ ബൈക്കില്‍ എത്തിയ ഇയാള്‍ ബൈക്കില്‍ നിന്നിറങ്ങി നഗ്‌നത പ്രദര്‍ശിപ്പിക്കുകയായിരുന്നു എന്ന് പോലീസ് പറഞ്ഞു. പെണ്‍കുട്ടി ബഹളം വച്ച് ഓടി. നിലവിളി കേട്ട് പിതൃസഹോദരന്‍ ഓടിയെത്തിയപ്പോഴേക്കും യുവാവ് ബൈക്കില്‍ കയറി രക്ഷപ്പെടുകയായിരുന്നു.തുടര്‍ന്ന് വാഹന നമ്പര്‍ സഹിതം മുണ്ടക്കയം പൊലീസില്‍ പരാതി നല്‍കി. പിന്നീട് നടത്തിയ അന്വേഷണത്തിലാണ് പ്രതി പിടിയിലായത്.