അഗ്‌നിപഥ്: എട്ട് ട്രെയിനുകള്‍ റദ്ദാക്കി; റിക്രൂട്ട്‌മെന്റ് വിശദാംശങ്ങള്‍ പുറത്തുവിട്ട് വ്യോമസേന

ന്യൂഡല്‍ഹി അഗ്‌നിപഥ് പ്രതിഷേധത്തെ തുടര്‍ന്ന് ഇന്ന് എട്ട് ട്രെയിനുകള്‍ റദ്ദാക്കിയതായി ഈസ്റ്റ് സെന്‍ട്രല്‍ റെയില്‍വേ അറിയിച്ചു. ആറു ട്രെയിനുകളുടെ സമയക്രമം പുനഃക്രമീകരിച്ചു. അഗ്‌നിപഥ് പ്രതിഷേധവുമായി ബന്ധപ്പെട്ട് ഇതുവരെ 362 ട്രെയിനുകളാണു റദ്ദാക്കിയത്. അതേസമയം, അഗ്‌നിപഥുമായി മുന്നോട്ടു പോകുകയാണ് സൈന്യം വ്യക്തമാക്കി. റിക്രൂട്ട്‌മെന്റുമായി ബന്ധപ്പെട്ട വിശദാംശങ്ങള്‍ വ്യോമസേന പുറത്തുവിടുകയും ചെയ്തു. റിക്രൂട്ട്‌മെന്റിനായുള്ള നടപടികള്‍ വെള്ളിയാഴ്ച തുടങ്ങും. നാല് ദിവസത്തിനിടെ 60 ട്രെയിനുകളിലെ കോച്ചുകള്‍ പ്രതിഷേധക്കാര്‍ അഗ്‌നിക്കിരയാക്കി. ബിഹാറില്‍ 11 ട്രെയിന്‍ എന്‍ജിനുകളും കത്തിച്ചു. റെയില്‍വേ സ്റ്റേഷനുകളിലെ സ്റ്റാളുകളും മറ്റ് വസ്തുക്കളും പ്രതിഷേധക്കാര്‍ നശിപ്പിച്ചു. ബിഹാറിലെ 15 ജില്ലകളില്‍ ഇത്തരം സംഭവങ്ങള്‍ റിപ്പോര്‍ട്ട് ചെയ്തു. ബിഹാറില്‍ മാത്രം ഇതുവരെ 700 കോടിയോളം രൂപയുടെ നഷ്ടമുണ്ടായതാണ് റെയില്‍വേയുടെ കണക്ക്. ഇന്ത്യന്‍ റെയില്‍വേ ഉദ്യോഗസ്ഥരില്‍നിന്നുള്ള വിവരങ്ങള്‍ പ്രകാരം ട്രെയിനിലെ ഒരു ജനറല്‍ കോച്ച് നിര്‍മിക്കാന്‍ 80 ലക്ഷം രൂപയാണു ചെലവ്. സ്ലീപ്പര്‍ കോച്ചിന് 1.25 കോടിയും എസി കോച്ചിന് 3.5 കോടി രൂപയും ചെലവാകും. ട്രെയിന്‍ എന്‍ജിനുകള്‍ക്ക് 20 കോടി രൂപയാണു നിര്‍മാണ ചെലവ്.