ബിജെപി നേതാക്കളുടെ പരാമര്‍ശത്തെ അപലപിക്കുന്നു: വിമര്‍ശിച്ച് യുഎസും

വാഷിങ്ടന്‍ ബിജെപി നേതാക്കളുടെ പ്രവാചകനിന്ദയില്‍ അപലപിച്ചു യുഎസും. നിന്ദ്യമായ പരാമര്‍ശത്തിനെതിരെ പരസ്യമായി ബിജെപി അപലപിച്ചതില്‍ സന്തോഷമുണ്ടെന്നും യുഎസ് വ്യക്തമാക്കി. മുസ്‌ലിം രാജ്യങ്ങളില്‍നിന്നടക്കം വ്യാപക പ്രതിഷേധമുയര്‍ന്നതിനു പിന്നാലെയാണ് അമേരിക്കയും വിമര്‍ശനവുമായി രംഗത്തെത്തിയത്. 'പ്രവാചകനെതിരെ രണ്ടു ബിജെപി നേതാക്കളുടെ നിന്ദ്യമായ പരാമര്‍ശത്തെ ഞങ്ങള്‍ അപലപിക്കുന്നു. പാര്‍ട്ടി പരസ്യമായി നേതാക്കളുടെ പ്രസ്താവനയെ അപലപിച്ചു കണ്ടതില്‍ സന്തോഷം. മതസ്വാതന്ത്ര്യവും വിശ്വാസവും ഉള്‍പ്പെടെയുള്ള മനുഷ്യാവകാശ വിഷയങ്ങളില്‍ ഇന്ത്യന്‍ സര്‍ക്കാരുമായി ഉന്നതതലത്തില്‍ നിരന്തരമായി ആശയവിനിമയം നടത്തുന്നുണ്ട്. മനുഷ്യാവകാശങ്ങളെ ബഹുമാനിക്കുന്നത് ഇന്ത്യ പ്രോത്സാഹിപ്പിക്കണം.'- സ്റ്റേറ്റ് ഡിപ്പാര്‍ട്ട്മെന്റ് വക്താവ് നെഡ് പ്രൈസ് മാധ്യമങ്ങളോടു പറഞ്ഞു. ടിവി ചാനല്‍ ചര്‍ച്ചയ്ക്കിടെയായിരുന്നു മുന്‍ വക്താവ് നൂപുര്‍ ശര്‍മയുടെ പരാമര്‍ശം. വിവാദമായതോടെ നൂപുര്‍ ശര്‍മയെ ബിജെപിയുടെ പ്രാഥമികാംഗത്വത്തില്‍നിന്ന് സസ്‌പെന്‍ഡ് ചെയ്യുകയും ഡല്‍ഹി ഘടകം മാധ്യമ വിഭാഗം ചുമതലക്കാരന്‍ നവീന്‍ കുമാര്‍ ജിന്‍ഡാലിനെ പുറത്താക്കുകയും ചെയ്തു. ആരുടെയും മതവികാരം വ്രണപ്പെടുത്താന്‍ ഉദ്ദേശിച്ചിരുന്നില്ലെന്നും തന്റെ മതവിശ്വാസത്തെ മുറിവേല്‍പ്പിച്ചപ്പോള്‍ പരാമര്‍ശം നടത്തിയതാണെന്നുമാണു നൂപുര്‍ ശര്‍മയുടെ വിശദീകരണം.