നേത്രാവതിക്ക് വേഗം കൂടും; പൂര്‍ണ എക്സ്പ്രസ് കോട്ടയത്തേക്ക് നീട്ടും

തിരുവനന്തപുരത്തുനിന്ന് ലോക്മാന്യ തിലക് ടെര്‍മിനസിലേക്കോടുന്ന നേത്രാവതി എക്സ്പ്രസിന്റെ വേഗം വര്‍ധിപ്പിക്കാന്‍ റെയില്‍വേ തീരുമാനിച്ചു. കഴിഞ്ഞ മൂന്നു ദിവസമായി ബംഗളൂരുവില്‍ നടന്ന റെയില്‍വേ ടൈം ടേബിള്‍ സമിതി യോഗത്തിലാണ് തീരുമാനം. കോട്ടയം ടെര്‍മിനസ് പൂര്‍ത്തിയാകുന്നതോടെ പുണെ-ഏറണാകുളം പൂര്‍ണ എക്സ്പ്രസ് കോട്ടയത്തേക്ക് നീട്ടാനും തീരുമാനമായി. തിരുവനന്തപരുത്തുനിന്ന് പുറപ്പെടുന്ന നേത്രാവതിയുടെ വേഗമാണ് തത്കാലം കൂട്ടുന്നത്. തിരിച്ചുള്ള ഓട്ടം പഴയ വേഗത്തില്‍ തന്നെയായിരിക്കും. ഇരുഭാഗത്തേക്കുമുള്ള ഓട്ടത്തിന് വേഗം വര്‍ധിപ്പിച്ച് നേത്രാവതിയെ സൂപ്പര്‍ ഫാസ്റ്റാക്കാമെന്ന മധ്യ റെയില്‍വേ ആലോചന ഫലം കണാതെപോയി. വര്‍ധിപ്പിച്ച വേഗത്തില്‍ രണ്ട് മണിക്കൂറോളം യാത്രാസമയം ലാഭിക്കാം. കൊങ്കണ്‍ പാതയിലെ മണ്‍സൂണ്‍ സമയക്രമം അവസാനിച്ച ശേഷമാവും ഇത് നടപ്പാക്കുക. നേത്രാവതിയെ എല്‍.ടി.ടി.-മംഗളൂരു മത്സ്യഗന്ധ എക്സ്പ്രസ് ഇന്റര്‍ ലിങ്ക് ചെയ്യാനും തീരുമാനിച്ചു. തിരുവനന്തപരുത്ത് നിന്നും നേത്രാവതി നിലവിലുള്ള സമയത്തിന് ഒരു മണിക്കൂര്‍ മുമ്പ് പുറപ്പെട്ട് അടുത്ത ദിവസം ഉച്ചയ്ക്ക് ഒന്നരയോടെ മുംബൈയിലെത്തും. ഇവിടെയെത്തുന്ന നേത്രാവതിയുടെ റേക്ക്(വണ്ടി) മത്സ്യഗന്ധ എക്സ് പ്രസായി തിരിച്ചുപോകും. കാലത്ത് ഏഴരയോടെ മുംബൈയിലെത്തുന്ന മത്സ്യഗന്ധ എക്സ്പ്രസ് നേത്രാവതിയായി തിരികെപ്പോകും. രണ്ട് വണ്ടികള്‍ക്കുമായി എട്ടു റേക്കുകള്‍ ഉപയോഗിച്ചിരുന്നത് ഏഴാക്കി കുറയ്ക്കാനും കഴിയും. കോട്ടയം ടെര്‍മിനസ് ഏകദേശം ഒരുമാസം കൊണ്ട് പൂര്‍ത്തിയാകുമെന്നാണ് ദക്ഷിണ റെയില്‍വേ നല്‍കിയ ഉറപ്പ്. ഇതോടെ പൂര്‍ണ എക്സ്പ്രസ് കോട്ടയത്തേക്ക് നീട്ടും. ഭാവിയില്‍ എല്‍.ടി.ടി.-ഏറണാകുളം തുരന്തോ എക്സ്പ്രസും കോട്ടയത്തേക്ക് നീട്ടാന്‍ ആലോചനയുണ്ട്.