രാഷ്ട്രപതി തിരഞ്ഞെടുപ്പ്: പൊതു സ്ഥാനാര്‍ഥിക്കായി ചര്‍ച്ച, നേതൃത്വം നല്‍കി കോണ്‍ഗ്രസ്

രാഷ്ട്രപതി തിരഞ്ഞെടുപ്പിനുള്ള തീയതി പ്രഖ്യാപിച്ചതോടെ പൊതു സ്ഥാനാര്‍ഥിയെ തീരുമാനിക്കാനുള്ള ചര്‍ച്ചകളിലേക്ക് കടന്ന് പ്രതിപക്ഷ പാര്‍ട്ടികള്‍. കോണ്‍ഗ്രസാണു ചര്‍ച്ചകള്‍ക്കു നേതൃത്വം നല്‍കുന്നത്. വിജയ സാധ്യത ഇല്ലാത്തതിനാല്‍ ലോക്‌സഭ തിരഞ്ഞെടുപ്പിനു മുന്‍പുള്ള ഐക്യ പ്രകടനത്തിനുള്ള വേദിയാണു പ്രതിപക്ഷത്തിനു രാഷ്ട്രപതി തിരഞ്ഞെടുപ്പ്. രാഷ്ട്രപതി തിരഞ്ഞെടുപ്പു തീയതി പ്രഖ്യാപിച്ചത് ഇന്നലെയാണെങ്കിലും ദിവസങ്ങള്‍ക്കു മുന്‍പേ കോണ്‍ഗ്രസ് ചര്‍ച്ചകള്‍ക്കു തുടക്കമിട്ടിരുന്നു. അധ്യക്ഷ സോണിയ ഗാന്ധി, എന്‍സിപി നേതാവ് ശരദ് പവാറുമായും ബംഗാള്‍ മുഖ്യമന്ത്രി മമത ബാനര്‍ജിയുമായും ചര്‍ച്ച നടത്തി. തുടര്‍ചര്‍ച്ചകള്‍ക്കായി മുതിര്‍ന്ന നേതാവ് മല്ലികാര്‍ജുന്‍ ഖര്‍ഗെയെ ചുമതലപ്പെടുത്തിയിട്ടുണ്ട്. സ്വന്തമായി സ്ഥാനാര്‍ഥിയെ നിര്‍ത്തില്ലെന്നും പ്രതിപക്ഷ ഐക്യംകൂടി ലക്ഷ്യംവച്ചു പൊതു സ്ഥാനാര്‍ഥിയെ നിര്‍ത്താനാണു നീക്കമെന്നും കോണ്‍ഗ്രസ് വ്യക്തമാക്കിയിട്ടുണ്ട്. പൊതു സ്വീകാര്യനായ സ്ഥാനാര്‍ഥിയെ നിര്‍ത്തിയാല്‍ പിന്തുണയ്ക്കുമെന്ന് ഇടതുപക്ഷവും വ്യക്തമാക്കിയിട്ടുണ്ട്. ബിജെഡി, വൈഎസ്ആര്‍ കോണ്‍ഗ്രസ് അടക്കമുള്ള പാര്‍ട്ടികള്‍ സര്‍ക്കാരിനൊപ്പം നില്‍ക്കുന്നതിനാല്‍ ജയ സാധ്യത പ്രതിപക്ഷത്തിനില്ല. എന്നാല്‍ വരാനിരിക്കുന്ന ലോക്‌സഭ തിരഞ്ഞെടുപ്പില്‍ വിശാല പ്രതിപക്ഷ ഐക്യം എന്ന സങ്കല്‍പം എത്രത്തോളം പ്രായോഗികമാണെന്നു രാഷ്ട്രപതി തിരഞ്ഞെടുപ്പ് തെളിയിക്കും.