വിവാഹ വാര്‍ഷിക ദിനത്തില്‍ ഭാര്യയേയും മക്കളേയും വെട്ടിക്കൊന്ന് ഭര്‍ത്താവ് ജീവനൊടുക്കി

ചെന്നൈയില്‍ വിവാഹ വാര്‍ഷിക ദിനത്തില്‍ ഭാര്യയേയും മക്കളേയും വെട്ടിക്കൊന്ന ശേഷം ഭര്‍ത്താവ് ജീവനൊടുക്കി. ചെന്നൈ പല്ലാവരം പൊഴിച്ചല്ലൂരിലാണ് സംഭവം. ഓണ്‍ലൈന്‍ വഴി വാങ്ങിയ ഇലക്ട്രിക് വാള്‍ ഉപയോഗിച്ചായിരുന്നു അരുംകൊലയും ആത്മഹത്യയും നടത്തിയത്. ഐടി കമ്പനിക്കാരനായ പ്രകാശാണ് ഭാര്യ ഗായത്രി, മക്കളായ നിത്യശ്രീ, ഹരികൃഷ്ണന്‍ എന്നിവരെ കഴുത്തറുത്ത് കൊന്നതിന് ശേഷം ജീവനൊടുക്കിയത്. കടബാധ്യതയാണ് സംഭവത്തിന് പിന്നിലെന്നാണ് പ്രാഥമിക നിഗമനം. ഈ മാസം 19ന് പ്രകാശ് ഓണ്‍ലൈന്‍ വഴി ഒരു പവര്‍ സോ വാങ്ങിയിരുന്നു. ഇതുപയോഗിച്ചാണ് കൃത്യം നടത്തിയത്. കൊലപാതകങ്ങള്‍ക്ക് ശേഷം പ്രകാശും സ്വയം കഴുത്തറുക്കുകയായിരുന്നു. മരണത്തിന് ആരും ഉത്തരവാദികളല്ലെന്ന് കടലാസില്‍ എഴുതി വാതിലില്‍ പതിച്ചിരുന്നു. ഇത്രയും ദിവസം മുമ്പേ വാള്‍ വാങ്ങി സൂക്ഷിച്ചതുകൊണ്ട് മുന്‍കൂട്ടി ആസൂത്രണം നടന്നതായി പൊലീസ് സംശയിക്കുന്നു. എല്ലാവരുടെയും മൃതദേഹങ്ങള്‍ ഒരേ മുറിയില്‍ തന്നെ ആയിരുന്നു. പെട്ടെന്നുണ്ടായ പ്രകോപനത്തില്‍ വാങ്ങി വച്ച ഇലക്ട്രിക് വാള്‍ എടുത്ത് ഉപയോഗിച്ചതാണോ എന്നും അന്വേഷിക്കുന്നുണ്ട്. ഇതുസംബന്ധിച്ച് ഭീഷണികള്‍ എന്തെങ്കിലും ഉണ്ടായിരുന്നോ എന്നും പൊലീസ് അന്വേഷിക്കുന്നുണ്ട്. ഇതിനായി ഫോണ്‍ രേഖകള്‍ പരിശോധിച്ചുവരികയാണെന്ന് പൊലീസ് അറിയിച്ചു.