വധശിക്ഷ നിര്‍ത്തലാക്കുമെന്ന് സാംബിയ; സ്വാഗതം ചെയ്ത് യുഎന്‍

വധശിക്ഷ നിര്‍ത്തലാക്കാനുള്ള സാംബിയയുടെ പ്രഖ്യാപനത്തെ സ്വാഗതം ചെയ്ത് യുഎന്‍. വാഗ്ദാനം യാഥാര്‍ത്ഥ്യമാക്കുന്നതിന് സാംബിയന്‍ അധികാരികള്‍ക്ക് സാങ്കേതിക സഹായവും സഹകരണവും നല്‍കാന്‍ OHCHR തയ്യാറാണെന്ന് യുഎന്‍ മനുഷ്യാവകാശ ഓഫീസ് വക്താവ് സെയ്ഫ് മഗഗ്‌നോ പറഞ്ഞു. ''രാജ്യത്ത് വധശിക്ഷ നിര്‍ത്തലാക്കുമെന്നും, ക്രൂരവും മനുഷ്യത്വരഹിതവും നികൃഷ്ടവുമായ ശിക്ഷാവിധി അവസാനിപ്പിക്കാന്‍ പാര്‍ലമെന്റുമായി സഹകരിച്ച് പ്രവര്‍ത്തിക്കുമെന്ന സാംബിയന്‍ പ്രസിഡന്റിന്റെ പ്രഖ്യാപനം സ്വാഗതം ചെയ്യുന്നു''-സെയ്ഫ് മഗാംഗോ പറഞ്ഞു. വധശിക്ഷ മൗലിക മനുഷ്യാവകാശങ്ങള്‍ക്കും അന്തസ്സിനും യോജിച്ചതന്‌ല്ലെന്നും അദ്ദേഹം കൂട്ടിച്ചേര്‍ത്തു. ക്യാപിറ്റല്‍ പണിഷ്‌മെന്റ് നിര്‍ത്തലാക്കല്‍, രാജ്യത്തെ മനുഷ്യാവകാശങ്ങളുടെ ഒരു പ്രധാന ചുവടുവയ്പായിരിക്കുമെന്നും മഗാംഗോ പറഞ്ഞു. ആഫ്രിക്ക ദിനത്തോടനുബന്ധിച്ച് നടത്തിയ പ്രസംഗത്തില്‍ പ്രസിഡന്റ് ഹകൈന്‍ഡെ ഹിചിലേമ വധശിക്ഷ നിര്‍ത്തലാക്കുമെന്ന് പ്രഖ്യാപിച്ചതായി യുഎന്‍ ന്യൂസ് റിപ്പോര്‍ട്ട് ചെയ്തിരുന്നു. 170-ഓളം രാജ്യങ്ങള്‍ ക്യാപിറ്റല്‍ പണിഷ്‌മെന്റ് നിര്‍ത്തലാക്കുകയോ മൊറട്ടോറിയം ഏര്‍പ്പെടുത്തുകയോ ചെയ്തിട്ടുണ്ട്.