കൊച്ചിയിലെ ചതുപ്പില്‍ ഇടിച്ചിറക്കിയ ഹെലികോപ്റ്റര്‍ വില്‍പനയ്ക്ക്

ലുലു ഗ്രൂപ്പ് ചെയര്‍മാന്‍ എം.എ. യൂസഫലിയും ഭാര്യയും സഞ്ചരിക്കവെ കൊച്ചിയില്‍ അപകടത്തില്‍ പെട്ട ഹെലികോപ്റ്റര്‍ വില്‍പനയ്ക്ക്. ഇറ്റാലിയന്‍ കമ്പനി അഗസ്റ്റ വെസ്റ്റ്‌ലന്‍ഡിന്റെ 109 എസ്പി ഹെലികോപ്റ്ററാണിത്. കഴിഞ്ഞ വര്‍ഷം ഏപ്രില്‍ 11നാണ് ഹെലികോപ്റ്റര്‍ കൊച്ചി പനങ്ങാട്ടെ ചതുപ്പില്‍ ഇറക്കിയത്. ഒരു വര്‍ഷത്തിനു ശേഷമാണ് ടെണ്ടര്‍ വിളിച്ച് ഹെലികോപ്റ്റര്‍ വില്‍ക്കുന്നത്. നാലു വര്‍ഷത്തെ പഴക്കമുള്ള ഹെലികോപ്റ്ററില്‍ പൈലറ്റ് അടക്കം ആറുപേര്‍ക്കു സഞ്ചരിക്കാം. 50 കോടിയോളം രൂപ വിലയുണ്ട്. കൊച്ചി വിമാനത്താവളത്തിന്റെ ഹാങ്കറിലാണ് ഇപ്പോള്‍ ഹെലികോപ്റ്ററുള്ളത്. ഇന്‍ഷുറന്‍സ് നഷ്ടപരിഹാരം തീര്‍പ്പാക്കുന്നതിന്റെ ഭാഗമായാണ് ഹെലികോപ്റ്റര്‍ വിറ്റൊഴിവാക്കുന്നത്. പറക്കാവുന്ന സ്ഥിതിയിലല്ല ഹെലികോപ്റ്ററുള്ളത്. ഹെലികോപ്റ്റര്‍ ഭാഗങ്ങള്‍ വേര്‍തിരിച്ചു വില്‍ക്കാനും സാധിക്കും. ഇപ്പോള്‍ പറക്കാവുന്ന അവസ്ഥയിലല്ലെങ്കിലും അറ്റകുറ്റപ്പണികള്‍ ചെയ്ത് ഉപയോഗക്ഷമമാക്കാമെന്നാണ് അധികൃതരുടെ വാദം.