വീണ്ടും സ്വാതന്ത്ര്യസമരം തുടങ്ങുന്നു: ഇമ്രാന്‍; പാക്കിസ്ഥാന് ഇന്ന് പുതിയ പ്രധാനമന്ത്രി

അവിശ്വാസ പ്രമേയ വോട്ടെടുപ്പിലൂടെ ഇമ്രാന്‍ ഖാന്‍ പുറത്തായതോടെ, പാക്കിസ്ഥാനില്‍ പുതിയ പ്രധാനമന്ത്രിയെ തിരഞ്ഞെടുക്കാന്‍ ദേശീയ അസംബ്ലി (പാര്‍ലമെന്റ്) ഇന്നു ചേരും. 13 മണിക്കൂറിലേറെ നീണ്ട പ്രക്ഷുബ്ധമായ സഭാ നടപടികള്‍ക്കൊടുവില്‍ ശനിയാഴ്ച അര്‍ധരാത്രിക്കുശേഷം നടന്ന അവിശ്വാസ പ്രമേയ വോട്ടെടുപ്പിലൂടെയാണു പ്രതിപക്ഷസഖ്യം ഇമ്രാന്‍ സര്‍ക്കാരിനെ പുറത്താക്കിയത്. ഭരണകക്ഷി അംഗങ്ങള്‍ ബഹിഷ്‌കരിച്ച വോട്ടെടുപ്പില്‍ പ്രതിപക്ഷ സഖ്യത്തിന് 174 വോട്ടു ലഭിച്ചു. 342 അംഗ സഭയില്‍ 172 വോട്ടാണു കേവല ഭൂരിപക്ഷത്തിനു വേണ്ടത്. സഭയില്‍ ഇമ്രാന്‍ ഖാന്‍ ഹാജരായിരുന്നില്ല. പാക്ക് ചരിത്രത്തില്‍ അവിശ്വാസ വോട്ടെടുപ്പിലൂടെ പുറത്താകുന്ന ആദ്യ പ്രധാനമന്ത്രിയാണ് ഇമ്രാന്‍. മുന്‍ പ്രധാനമന്ത്രി നവാസ് ഷരീഫിന്റെ ഇളയ സഹോദരനും പാക്കിസ്ഥാന്‍ മുസ്ലിം ലീഗ്‌നവാസ് (പിഎംഎല്‍-എന്‍) അധ്യക്ഷനുമായ ഷഹബാസ് ഷരീഫ് (70) പ്രതിപക്ഷസഖ്യത്തിന്റെ പ്രധാനമന്ത്രി സ്ഥാനാര്‍ഥിയായി നാമനിര്‍ദേശപത്രിക നല്‍കി. ഇമ്രാന്റെ കക്ഷിയായ പാക്കിസ്ഥാന്‍ തെഹ്രികെ ഇന്‍സാഫ് (പിടിഐ) സ്ഥാനാര്‍ഥിയായി മുന്‍ വിദേശകാര്യമന്ത്രി ഷാ മെഹ്‌മൂദ് ഖുറേഷിയും പത്രിക നല്‍കി. ഇമ്രാന്‍ ഖാന്‍ (69) 2018 ഓഗസ്റ്റ് 18നാണ് അധികാരമേറ്റത്. മൂന്നു വര്‍ഷവും ഏഴു മാസവുമാണ് അധികാരത്തിലിരുന്നത്. പാക്കിസ്ഥാനില്‍ ഒരു പ്രധാനമന്ത്രിയും കാലാവധി തികച്ചിട്ടില്ലെന്ന ചരിത്രം ഇമ്രാനിലൂടെയും ആവര്‍ത്തിച്ചു. സുപ്രീം കോടതി ഇടപെടലിനു ശേഷവും അവിശ്വാസ പ്രമേയത്തില്‍ വോട്ടെടുപ്പു നടത്താതെ നീട്ടിക്കൊണ്ടുപോകാനാണു ശ്രമമെന്നു വ്യക്തമായതോടെ, ശനിയാഴ്ച രാത്രി വൈകി സേനാമേധാവി ജനറല്‍ ഖമര്‍ ജാവേദ് ബജ്വ ഇമ്രാനുമായി കൂടിക്കാഴ്ച നടത്തിയെന്ന് അഭ്യൂഹമുയര്‍ന്നു. സുപ്രീം കോടതി അടിയന്തര സിറ്റിങ് നടത്താനും തീരുമാനിച്ചു. ഇതോടെ അര്‍ധരാത്രി വീണ്ടും സഭ ചേര്‍ന്നപ്പോള്‍ സ്പീക്കറും ഡപ്യൂട്ടി സ്പീക്കറും രാജി നല്‍കി ഭരണപക്ഷം സഭ വിട്ടു. മുതിര്‍ന്ന പ്രതിപക്ഷാംഗം ഇടക്കാല സ്പീക്കറായി ചുമതലയേറ്റാണു വോട്ടെടുപ്പു നടത്തിയത്. വീണ്ടും സ്വാതന്ത്ര്യസമരം: ഇമ്രാന്‍ ഇസ്ലാമാബാദ് ന്മ അധികാരം വിട്ടിറങ്ങുമ്പോഴും യുഎസിനെതിരെ വിരല്‍ ചൂണ്ടി ഇമ്രാന്‍ ഖാന്‍. തന്റെ സര്‍ക്കാരിനെ പുറത്താക്കാന്‍ വിദേശ ഗൂഢാലോചന നടന്നുവെന്ന ആരോപണം ഇന്നലെയും അദ്ദേഹം ആവര്‍ത്തിച്ചു. 'പാക്കിസ്ഥാന്‍ 1947ല്‍ സ്വതന്ത്ര രാജ്യമായി. പക്ഷേ ഇന്നു മുതല്‍ സ്വാതന്ത്ര്യസമരം വീണ്ടും തുടങ്ങുന്നു. പരമാധികാരവും ജനാധിപത്യവും എന്നും കാത്തുസംരക്ഷിക്കുന്നതു രാജ്യത്തെ ജനങ്ങളാണ്'- ഇമ്രാന്‍ ട്വിറ്ററില്‍ കുറിച്ചു. താന്‍ അധികാരത്തില്‍ തുടരുന്നതു ഗുരുതരമായ പ്രത്യാഘാതങ്ങളുണ്ടാക്കുമെന്ന് യുഎസ് നയതന്ത്രജ്ഞന്‍ അയച്ച കത്തില്‍ പറഞ്ഞുവെന്നാണ് ഇമ്രാന്‍ ആരോപിച്ചത്. ആരോപണം ഇന്നലെ യുഎസ് വീണ്ടും നിഷേധിച്ചു.