‘കൊറിയ പോലെ യുക്രെയ്‌നെ രണ്ടായി വിഭജിക്കാന്‍ ശ്രമം; ഗറില്ലാ യുദ്ധം വേണ്ടിവരും’

കൊറിയയുടെ കാര്യത്തില്‍ സംഭവിച്ചതു പോലെ യുക്രെയ്‌നെ രണ്ടായി വിഭജിക്കാനാണ് റഷ്യയുടെ ശ്രമമെന്ന് യുക്രെയ്ന്‍ മിലിറ്ററി ഇന്റലിജന്‍സ് മേധാവി ക്രൈലോ ബിഡാനോവ്. രാജ്യത്തിന്റെ വിഭജനം ഇല്ലാതാക്കാന്‍ ഗറില്ലാ യുദ്ധരീതി വേണ്ടിവരുമെന്നും അദ്ദേഹം സൂചിപ്പിച്ചു. രണ്ടാം ലോക മഹായുദ്ധത്തിനു പിന്നാലെയാണ് ഉത്തര കൊറിയ, ദക്ഷിണ കൊറിയ എന്നിങ്ങനെ രണ്ടു രാജ്യങ്ങളായി കൊറിയ വിഭജിക്കപ്പെട്ടത്. റഷ്യന്‍ സേനയ്‌ക്കെതിരെ പോരാടാന്‍ യുക്രെയ്‌നു യുദ്ധടാങ്കുകളും വിമാനങ്ങളും മിസൈലുകളും എത്തിക്കണമെന്ന് പ്രസിഡന്റ് വൊളോഡിമിര്‍ സെലെന്‍സ്‌കി പാശ്ചാത്യ രാജ്യങ്ങളോട് ആവശ്യപ്പെട്ടു. റഷ്യ എണ്ണയും ഭക്ഷ്യ വസ്തുക്കളും സൂക്ഷിച്ചിരിക്കുന്ന മേഖലകളിലേക്ക് ആക്രമണം വ്യാപിപ്പിച്ചതിനെ തുടര്‍ന്നാണ് സെലെന്‍സ്‌കിയുടെ അഭ്യര്‍ഥന. റഷ്യയുടെ മിസൈലുകള്‍ യുക്രെയ്‌നിലെ ഒരു എണ്ണ സംഭരണശാലയും പോളിഷ് അതിര്‍ത്തിയില്‍നിന്നു 60 കിലോമീറ്റര്‍ അകലെയുള്ള മിലിറ്ററി റിപ്പയര്‍ പ്ലാന്റും ശനിയാഴ്ച തകര്‍ത്തതായി വാര്‍ത്താ ഏജന്‍സി റിപ്പോര്‍ട്ടു ചെയ്തിരുന്നു. എന്നാല്‍ സൈനികനീക്കം നാലാഴ്ച പിന്നിടുമ്പോഴും യുക്രെയ്‌നിലെ പ്രധാന നഗരങ്ങളൊന്നും പിടിച്ചടക്കാന്‍ റഷ്യയ്ക്കായിട്ടില്ല. റഷ്യന്‍ അതിര്‍ത്തിയോടു ചേര്‍ന്ന ഡോണ്‍ബസ് മേഖല പൂര്‍ണമായി മോചിപ്പിക്കുന്നതില്‍ ഇനി ശ്രദ്ധ കേന്ദ്രീകരിക്കുമെന്നാണ് റഷ്യന്‍ പ്രതിരോധ മന്ത്രാലയം അറിയിച്ചത്. 2014മുതല്‍ ഇവിടെ വിമതര്‍ക്കു പിന്തുണയുമായി റഷ്യന്‍ സേനയുടെ സാന്നിധ്യമുണ്ട്. ഭൂരിപക്ഷവും റഷ്യന്‍ ഭാഷ സംസാരിക്കുന്ന ഡോണ്‍ബസ് മേഖലയെ സ്വതന്ത്ര പ്രദേശമായി നേരത്തേ റഷ്യന്‍ പാര്‍ലമെന്റും അംഗീകരിച്ചതാണ്.