പെണ്‍കുട്ടികളുടെ വിദ്യാഭ്യാസം തടയാന്‍ താലിബാന്‍ ശ്രമിക്കുന്നു; മലാല

പെണ്‍കുട്ടികളുടെ വിദ്യാഭ്യാസം തടയാനാണ് താലിബാന്‍ ശ്രമിച്ചുകൊണ്ടിരിക്കുന്നതെന്ന് മലാല യൂസഫ്സായി. പ്രൈമറി സ്‌കൂളിനപ്പുറം പെണ്‍കുട്ടികള്‍ പഠിക്കുന്നത് തടയാന്‍ താലിബാന്‍ ഒഴിവുകഴിവുകള്‍ നിരത്തുന്നത് തുടരുമെന്ന് മലാല ചൂണ്ടിക്കാട്ടി. കഴിഞ്ഞ ബുധനാഴ്ച പെണ്‍കുട്ടികളുടെ സ്‌കൂളുകള്‍ തുറക്കുമെന്നാണ് താലിബാന്‍ പറഞ്ഞിരുന്നത് എന്നാല്‍ ധരിക്കേണ്ട യൂണിഫോമിനെ സംബന്ധിച്ച് വ്യക്തതയില്ലെന്ന് പറഞ്ഞ് ഇത് മാറ്റി വയ്ക്കുകയുണ്ടായി. വിദ്യാസമ്പന്നരായ സ്ത്രീകളില്ലാത്ത അഫ്ഗാനിസ്താനെ കെട്ടിപ്പടുക്കാനാണ് താലിബാന്‍ ശ്രമിക്കുന്നതെന്ന് മലാല ആരോപിച്ചു. അഫാഗാനിസ്താന്‍ താലിബാന്‍ പിടിച്ചടക്കിയതിന് ശേഷം നല്‍കിയ വാഗ്ദാനങ്ങളില്‍ പെണ്‍കുട്ടികള്‍ക്ക് വിദ്യാഭ്യാസം അനുവദിക്കുമെന്ന് പറഞ്ഞിരുന്നു. എന്നാല്‍ ഇത് തെറ്റാണെന്നും 1996 മുതലേ താലിബാന്‍ പെണ്‍കുട്ടികള്‍ക്ക് വിദ്യാഭ്യാസം നല്‍കുന്നതിന് എതിരാണെന്നും മലാല ചൂണ്ടിക്കാട്ടി. അഫ്ഗാനിസ്താനില്‍ ഏഴു മാസത്തെ ഇടവേളക്കു ശേഷം പെണ്‍കുട്ടികളുടെ സ്‌കൂള്‍ ഇന്നലെ തുറന്നിരുന്നു. പിന്നാലെയാണ് താലിബാന്‍ അടച്ചുപൂട്ടല്‍ പ്രഖ്യാപിച്ചത്. പുതിയ ഉത്തരവ് വരുന്നതു വരെ സിക്‌സ്ത് ഗ്രേഡിനു മുകളിലുള്ള ക്ലാസുകളില്‍ പെണ്‍കുട്ടികള്‍ വരേണ്ടതില്ലെന്നാണ് താലിബാന്റെ അറിയിപ്പ്. അഫ്ഗാനില്‍ താലിബാന്‍ അധികാരമേറ്റതോടെ സ്ത്രീകള്‍ കനത്ത മനുഷ്യാവകാശ ലംഘനമാണ് നേരിട്ടത്. താലിബാന്‍ അഫ്ഗാന്റെ നിയന്ത്രണം ഏറ്റെടുത്തതോടെ രാജ്യത്തെ എല്ലാ സ്‌കൂളുകളിലും പെണ്‍കുട്ടികള്‍ പ്രവേശിക്കുന്നതിന് വിലക്കേര്‍പ്പെടുത്തിയിരുന്നു. പെണ്‍കുട്ടികളുടെ വിദ്യാഭ്യാസത്തിനുള്ള അവകാശം പാടെ നിഷേധിച്ചതിനു പുറമേ സ്ത്രീകള്‍ക്ക് സഞ്ചാര സ്വാന്തന്ത്ര്യവും ഉണ്ടായിരുന്നില്ല. പല സ്ത്രീകള്‍ക്കും വിദ്യാഭ്യാസ സ്ഥാപനങ്ങളിലേക്ക് മടങ്ങിവരാന്‍ കഴിയാത്ത സാഹചര്യമാണുള്ളത്. ഒട്ടുമിക്ക ജോലികള്‍ ചെയ്യുന്നതിലും താലിബാന്‍ സ്ത്രീകള്‍ക്ക് വിലക്കേര്‍പ്പെടുത്തിയത് ഇപ്പോഴും വലിയ വിമര്‍ശനങ്ങള്‍ക്കിടയാക്കുന്നുണ്ട്.