ചലച്ചിത്രമേളയിലെ ഇഷ്ടചിത്രം തെരഞ്ഞെടുക്കാനുള്ള വോട്ടെടുപ്പ് നാളെ മുതല്‍

ഇരുപത്തിയാറാമത് രാജ്യാന്തര ചലച്ചിത്രമേളയിലെ പ്രേക്ഷകരുടെ ഇഷ്ടചിത്രം തെരഞ്ഞെടുക്കാനുള്ള വോട്ടെടുപ്പ് നാളെ ആരംഭിക്കും. മത്സര വിഭാഗത്തിലെ 14 ചിത്രങ്ങളാണ് വോട്ടിംഗിനായി പരിഗണിച്ചിരിക്കുന്നത്. അക്കാദമിയുടെ ഔദ്യോഗിക വെബ്‌സൈറ്റ് വഴിയും എസ്എംഎസ് വഴിയും മൊബൈല്‍ ആപ്ലിക്കേഷന്‍ വഴിയും ഡെലിഗേറ്റുകള്‍ക്ക് ഇഷ്ട ചിത്രങ്ങള്‍ക്ക് വോട്ട് ചെയ്യാം. അനറ്റോളിയന്‍ ലെപ്പേര്‍ഡ്, കമീലിയ കംസ് ഔട്ട് റ്റു നൈറ്റ്, ക്യാപ്റ്റന്‍ വോള്‍കൊനോഗോവ് എസ്‌കേപ്പ്ഡ്, ക്ലാര സോള, കോസ്റ്റ ബ്രാവ, ലെബനന്‍, ഐ ആം നോട്ട് ദി റിവര്‍ ഝലം, ലെറ്റ് ഇറ്റ് ബി മോര്‍ണിംഗ്, മുറിന, കൂഴങ്കല്‍, സുഖ്‌റ ആന്‍ഡ് ഹെര്‍ സണ്‍സ്, യൂ റിസെമ്പിള്‍ മീ, യുനി, ഒപ്പം മലയാള ചിത്രങ്ങളായ നിഷിദ്ധോ, ആവാസവ്യൂഹം എന്നിവയും മത്സര വിഭാഗത്തില്‍ ഉള്‍പ്പെടുന്നു. രണ്ട് ലക്ഷം രൂപയും പ്രശസ്തിപത്രവുമടങ്ങുന്നതാണ് പുരസ്‌കാരം. അക്കാദമിയുടെ ഔദ്യോഗിക വെബ്‌സൈറ്റ് വഴിയോ എസ്എംഎസ് വഴിയോ മൊബൈല്‍ ആപ്ലിക്കേഷന്‍ വഴിയോ ഡെലിഗേറ്റുകള്‍ക്ക് വോട്ടുചെയ്യാം. എസ്എംഎസിലൂടെ വോട്ട് ചെയ്യുന്നതിന് IFFK < space > MOVIE CODE എന്ന ഫോര്‍മാറ്റില്‍ ടൈപ്പ് ചെയ്ത് 56070 എന്ന നമ്പറിലേക്ക് അയക്കണം. ഇത് പത്തൊന്‍പതാം വര്‍ഷമാണ് വോട്ടെടുപ്പിലൂടെയുള്ള പ്രേക്ഷക പുരസ്‌കാരം ഏര്‍പ്പെടുത്തുന്നത്. പങ്കാളിത്തം കൊണ്ടും ഇടപെടല്‍ കൊണ്ടും പ്രേക്ഷകര്‍ നെടുനായകത്വം വഹിക്കുന്ന ചലച്ചിത്ര മേളയാണ് IFFK.