ഐഎഫ്എഫ്കെ : ഇന്ന് 67 ചിത്രങ്ങള്‍ പ്രദര്‍ശിപ്പിക്കും

രാജ്യാന്തര ചലച്ചിത്ര മേളയുടെ മൂന്നാം ദിനമായ ഇന്ന് 67 ചിത്രങ്ങളാണ് പ്രദര്‍ശിപ്പിക്കുക. മത്സര വിഭാഗത്തിലെ മലയാള ചിത്രമായ നിഷിദ്ദോയുടെ ആദ്യ പ്രദര്‍ശനവും ഇന്ന് നടക്കും. എംറെ കൈസിന്റെ ടര്‍ക്കിഷ് ചിത്രം അനേറ്റോലിയന്‍ ലെപേര്‍ഡ്,അസര്‍ബൈജന്‍ ചിത്രം സുഖ്റ ആന്‍ഡ് സണ്‍സ്,കശ്മീരില്‍ ജീവിക്കുന്ന അഫീഫ എന്ന പെണ്‍കുട്ടിയുടെ ജീവിതം പ്രമേയമാക്കുന്ന ചിത്രം അയാം നോട്ട് ദി റിവര്‍ ജ്ജലം, അന്റോണേറ്റ കുസിജനോവിച് സംവിധാനം ചെയ്ത മുറിന, മലയാള ചിത്രം നിഷിദ്ധോ തുടങ്ങിയവയാണ് മത്സര വിഭാഗത്തില്‍ പ്രദര്‍ശിപ്പിക്കുന്ന ഇന്നത്തെ ചിത്രങ്ങള്‍. രണ്ട് തവണ ഓസ്‌കാര്‍ പുരസ്‌കാരം നേടിയ അസ്ഗര്‍ ഫര്‍ഹാദിയുടെ ഇറാനിയന്‍ ചിത്രം എ ഹീറോയുടെ മേളയിലെ ആദ്യ പ്രദര്‍ശനവും ഇന്നാണ്.നിശാഗന്ധി തീയറ്ററില്‍ വൈകീട്ട് 6.30 നാണു ചിത്രം പ്രദര്‍ശിപ്പിക്കുന്നത്. അള്‍ജീരിയന്‍ വംശജനായ അഹമ്മതും ട്യൂനീഷ്യന്‍ പെണ്‍കുട്ടിയായ ഫറായും തമ്മിലുള്ള തീവ്രമായ പ്രണയത്തിന്റെ കഥ പറയുന്ന ഫ്രഞ്ച് ചിത്രം എ റ്റെയില്‍ ഓഫ് ലവ് ആന്‍ഡ് ഡിയര്‍, സ്വവര്‍ഗനുരാഗികളായ രണ്ട് യുവാക്കള്‍ കുട്ടികളുടെ സംരക്ഷകരാകുന്ന മാനേലോ നീയെതോ സംവിധാനം ചെയ്ത ഉറുഗ്വന്‍ ചിത്രം ദി എംപ്ലോയര്‍ ആന്‍ഡ് എംപ്ലോയീ തുടങ്ങി 40 ചിത്രങ്ങളാണ് ലോക സിനിമാ വിഭാഗത്തില്‍ പ്രദര്‍ശിപ്പിക്കുന്നത്. നടേഷ് ഹെഡ്ഗേ സംവിധാനം ചെയ്ത പേഡ്രോ ഉള്‍പ്പെടെ 18 ഇന്ത്യന്‍ ചിത്രങ്ങളും ഇന്ന് പ്രദര്‍ശനത്തിനെത്തും.