ഐഎഫ്എഫ്കെ ‘സ്പിരിറ്റ് ഓഫ് സിനിമ പുരസ്‌കാരം’ ഇസ്താംബുള്‍ ചലച്ചിത്ര പ്രവര്‍ത്തക ലിസ കലാന്

ഇരുപത്തിയാറാമത് അന്താരഷ്ട്ര ചലച്ചിത്ര മേളയുടെ സ്പിരിറ്റ് ഓഫ് സിനിമ പുരസ്‌കാരം ഇസ്താംബുള്‍ ചലച്ചിത്ര പ്രവര്‍ത്തക ലിസ കലാന്. മുഖ്യമന്ത്രി പിണറായി വിജയന്‍ പുരസ്‌കാരം സമ്മാനിക്കുമെന്ന് ചലച്ചിത്ര അക്കാദമി ചെയര്‍മാന്‍ രഞ്ജിത്ത് അറിയിച്ചു. അഞ്ച് ലക്ഷം രൂപയാണ് പുരസ്‌കാര തുക. അന്താരാഷ്ട്ര ചലച്ചിത്ര മേളയില്‍ ഈ വര്‍ഷം ആരംഭിച്ച പുതിയ അവാര്‍ഡ് വിഭാഗമാണ് സ്പിരിറ്റ് ഓഫ് സിനിമാ അവാര്‍ഡ്. 2015ല്‍ തുര്‍ക്കിയില്‍ നടന്ന ഭീകരാക്രമണത്തിനിടെ ഇസ്താംബുള്‍ ചലച്ചിത്ര പ്രവര്‍ത്തക ലിസ കലാന് കാലുകള്‍ നഷ്ടമായി. ഐഎഫ്എഫ്‌കെയുടെ ഭാവി പതിപ്പുകളില്‍ ഇത്തരം ചലച്ചിത്ര പ്രവര്‍ത്തകരെ ഞങ്ങള്‍ തുടര്‍ന്നും ആദരിക്കുമെന്ന് ചലച്ചിത്ര അക്കാദമി ചെയര്‍മാന്‍ രഞ്ജിത്ത് പറഞ്ഞു. കൂടാതെ ഐഎഫ്എഫ്കെയില്‍ വിദ്യാര്‍ത്ഥികള്‍ക്ക് പ്രത്യേക പരിഗണന നല്‍കുമെന്നും അദ്ദേഹം പറഞ്ഞു. വിദ്യാര്‍ത്ഥികള്‍ സിനിമയെ ഗൗരവമായി കാണുന്നവരാണ്, അവരെ പ്രോത്സാഹിപ്പിക്കേണ്ടതുണ്ടെന്നും അദ്ദേഹം വ്യക്തമാക്കി. വിദ്യാര്‍ത്ഥികള്‍ക്കായി കഴിയുന്നത്ര പാസുകള്‍ നല്‍കാന്‍ ശ്രമിക്കുന്നുണ്ട്. കൂടാതെ ചലച്ചിത്ര മേളയുടെ സമയത്ത് അവര്‍ക്ക് താമസിക്കാന്‍ ഹോട്ടലുകളില്‍ നിന്ന് ഇളവുകള്‍ വാങ്ങി നല്‍കാനും ഞങ്ങള്‍ ശ്രമിക്കുന്നുണ്ടെന്നും അദ്ദേഹം വ്യക്തമാക്കി.