‘അണ്‍ഫൊര്‍ഗെറ്റബിള്‍ വേണുച്ചേട്ടന്‍’; നെടുമുടി വേണുവിന് ട്രിബ്യൂട്ടുമായി ഐഎഫ്എഫ്‌കെ

അടുത്തിടെ അന്തരിച്ച നടന്‍ നെടുമുടി വേണുവിന് ട്രിബ്യൂട്ടുമായി രാജ്യാന്തര ചലച്ചിത്രോത്സവം. നെടുമുടി വേണു അഭിനയിച്ച് അനശ്വരമാക്കിയ ഏഴ് സിനിമകള്‍ 'അണ്‍ഫൊര്‍ഗെറ്റബിള്‍ വേണുച്ചേട്ടന്‍' എന്ന വിഭാഗത്തില്‍ ഇക്കുറി പ്രദര്‍ശിപ്പിക്കും. ഈ മാസം 18 മുതല്‍ 25 വരെ തിരുവനന്തപുരത്താണ് രാജ്യാന്തര ചലച്ചിത്ര മേള നടക്കുക. മോഹന്റെ സംവിധാനത്തില്‍ 1981ല്‍ പുറത്തിറങ്ങിയ 'വിട പറയും മുന്‍പേ', ജി അരവിന്ദന്‍ സംവിധാനം ചെയ്ത് 1978ല്‍ റിലീസായ 'തമ്പ്', രാജീവ് വിജയ് രാഘവന്‍ സംവിധാനം ചെയ്ത് 2003ല്‍ പുറത്തിറങ്ങിയ 'മാര്‍ഗം', ജി അരവിന്ദന്റെ സംവിധാനത്തില്‍ 1981ല്‍ റിലീസായ കള്ളന്‍ പവിത്രന്‍, സത്യന്‍ അന്തിക്കാട് സംവിധാനം ചെയ്ത് 1984ല്‍ പുറത്തിറങ്ങിയ അപ്പുണ്ണി, ഭരതന്‍ സംവിധാനം ചെയ്ത് 1980ല്‍ തീയറ്ററുകളിലെത്തിയ ആരവം, അനില്‍ രാധാകൃഷ്ണന്‍ മേനോന്റെ സംവിധാനത്തില്‍ 2013ല്‍ റിലീസായ നോര്‍ത്ത് 24 കാതം എന്നീ സിനിമകളാണ് അണ്‍ഫൊര്‍ഗെറ്റബിള്‍ വേണുച്ചേട്ടനിലെ സിനിമകള്‍.