റഷ്യന്‍ അധിനിവേശം രൂക്ഷം; യുക്രൈനിലെ ഇന്ത്യന്‍ എംബസിയുടെ പ്രവര്‍ത്തനം പോളണ്ടിലേക്ക് മാറ്റി

യുക്രൈനില്‍ റഷ്യന്‍ അധിനിവേശം രൂക്ഷമാകുന്ന പശ്ചാത്തലത്തില്‍ ഇന്ത്യന്‍ എംബസിയുടെ പ്രവര്‍ത്തനം താത്ക്കാലികമായി പോളണ്ടിലേക്ക് മാറ്റി. യുക്രൈനിലെ സ്ഥിതിഗതികള്‍ മോശമാകുകയാണ്. റഷ്യയുടെ അധിനിവേശം പടിഞ്ഞാറന്‍ യുക്രൈനിലേക്ക് വ്യാപിച്ചിട്ടുണ്ടെന്നും വിദേശകാര്യ മന്ത്രാലയം വ്യക്തമാക്കി. യുക്രൈനിലെ സംഘര്‍ഷത്തില്‍ അയവ് വന്നാല്‍ തീരുമാനം പുന:പരിശോധിക്കുമെന്നും മന്ത്രാലയം അറിയിച്ചു യുക്രൈനിലെ സ്ഥിതി വിലയിരുത്താന്‍ പ്രധാനമന്ത്രി നരേന്ദ്ര മോദിയുടെ നേതൃത്വത്തില്‍ ഉന്നതതല യോഗം ചേര്‍ന്നിരുന്നു. ഈ യോഗത്തിന്റെ അടിസ്ഥാനത്തിലാണ് തീരുമാനം. യുക്രൈനില്‍ കുടുങ്ങിക്കിടന്ന ഇന്ത്യക്കാരെ തിരികെയെത്തിച്ച ഓപ്പറേഷന്‍ ഗംഗ മിഷനും യോഗത്തില്‍ വിലയിരുത്തി.അതേസമയം യുക്രൈനിലെ തെക്ക്-കിഴക്കന്‍ നഗരമായ മരിയുപോളില്‍ 2100-ലധികം നിവാസികള്‍ കൊല്ലപ്പെട്ടതായി സിറ്റി കൗണ്‍സില്‍. റഷ്യന്‍ അധിനിവേശത്തില്‍ ഇതുവരെ 2,187 പേര്‍ മരിച്ചു. അധിനിവേശത്തിന്റെ ആദ്യ ഒമ്പത് ദിവസങ്ങളില്‍ 1,207 സിവിലിയന്‍മാര്‍ കൊല്ലപ്പെട്ടു. 24 മണിക്കൂറിനിടെ നഗരത്തില്‍ 22 റഷ്യന്‍ ആക്രമണങ്ങള്‍ നടന്നതായും പ്രാദേശിക ഭരണകൂടം അറിയിച്ചു. 12 ദിവസമായി ജനങ്ങള്‍ ബുദ്ധിമുട്ടിലാണ്. നഗരത്തില്‍ വൈദ്യുതിയോ വെള്ളമോ മൊബൈല്‍ കണക്ഷനോ ഇല്ല. ഭക്ഷണത്തിന്റെയും വെള്ളത്തിന്റെയും ശേഖരം തീര്‍ന്നു. ഇതിനകം 100-ലധികം ബോംബുകള്‍ മരിയുപോളില്‍ പൊട്ടിയെന്നും അധികൃതര്‍ പ്രസ്താവനയില്‍ കൂട്ടിച്ചേര്‍ത്തു. യുക്രൈന് നേരെ രാസായുധ ആക്രമണം നടത്തിയാല്‍ റഷ്യ കടുത്ത വില നല്‍കേണ്ടിവരുമെന്ന് വൈറ്റ് ഹൗസ് ദേശീയ സുരക്ഷാ ഉപദേഷ്ടാവ് ജെയ്ക്ക് സള്ളിവന്‍ മുന്നറിയിപ്പ് നല്‍കിയതിന് പിന്നാലെയാണ് വാര്‍ത്ത പുറത്ത് വന്നത്.