കുഞ്ഞിനെ ഗര്‍ഭം ധരിച്ചതും പ്രസവിച്ചതും അവന്റെ അച്ഛന്‍; സംഭവം വൈറല്‍

'എനിക്ക് ഇപ്പോഴും വിശ്വസിക്കാന്‍ കഴിയുന്നില്ല' ഒരു ആണ്‍കുഞ്ഞിന് ജന്മം നല്‍കിയ 24 -കാരനായ റയാന്‍ സാന്‍ഡേഴ്‌സണ്‍ പറയുന്നു. തന്നെക്കൊണ്ട് ഒരിക്കലും ഒരു കുഞ്ഞിന് ജന്മം നല്‍കാന്‍ സാധിക്കില്ലെന്നായിരുന്നു അദ്ദേഹത്തിന്റെ വിശ്വാസം. എന്നാല്‍ ഗര്‍ഭിണിയാണെന്ന് കണ്ടെത്തി നിമിഷം റയാന്‍ ശരിക്കും സ്തംഭിച്ചു പോയി. ഒരു സ്ത്രീയില്‍ നിന്ന് പുരുഷനിലേക്കുള്ള രൂപമാറ്റത്തിനായുള്ള ചികിത്സയിലായിരുന്നു അദ്ദേഹം അപ്പോള്‍. എന്നാല്‍ ഹോര്‍മോണ്‍ ചികിത്സ തുടങ്ങി ഒമ്പത് ആഴ്ചകള്‍ക്കുള്ളില്‍ ഗര്‍ഭിണിയാവുകയായിരുന്നു. ടെസ്റ്റ് ചെയ്ത് പോസിറ്റീവ് ആണെന്ന് ഉറപ്പാക്കിയ ഉടനെ തന്നെ അദ്ദേഹം ഹോര്‍മോണ്‍ ചികിത്സകള്‍ താല്‍ക്കാലികമായി നിര്‍ത്തി വച്ചു. മാഞ്ചസ്റ്ററിലെ റോച്ച്ഡെയ്ലില്‍ നിന്നുള്ള നാടക വിദ്യാര്‍ത്ഥിയാണ് റയാന്‍. താന്‍ യഥാര്‍ത്ഥത്തില്‍ സ്ത്രീയല്ല മറിച്ച് ഒരു പുരുഷനാണെന്ന് റയാന്‍ തിരിച്ചറിഞ്ഞത് അദ്ദേഹത്തിന്റെ ഏഴാം വയസ്സിലാണ്. അന്നുമുതല്‍ തന്റെ ലിംഗ മാറ്റത്തിനായുള്ള പോരാട്ടത്തിലായിരുന്നു അദ്ദേഹം. ഗര്‍ഭകാലത്തുടനീളം ശാരീരിക മാറ്റങ്ങള്‍ മൂലം ബുദ്ധിമുട്ടിയെന്ന് അദ്ദേഹം പറയുന്നു. എന്നാല്‍ മകന്റെ മുഖം ആദ്യമായി കണ്ടപ്പോള്‍ വല്ലാത്ത അഭിമാനം തോന്നിയെന്നും അദ്ദേഹം കൂട്ടിച്ചേര്‍ത്തു. ഇപ്പോള്‍ അദ്ദേഹത്തിന്റെ മകന്‍ ഹെന്‍ഡ്രിക്കിന് രണ്ടു വയസ്സുണ്ട്. അവനെ നോക്കി വളര്‍ത്തണമെന്ന ഒറ്റ ചിന്തയിലാണ് റയാന്‍ ഇന്ന്. ശാരീരികമായി പൂര്‍ണമായും ഒരു പുരുഷനാകാനായി അദ്ദേഹം ഹോര്‍മോണ്‍ ഗുളികകള്‍ കഴിച്ചിരുന്നു. അതുകൊണ്ട് തന്നെ തനിക്ക് ഗര്‍ഭം ധരിക്കാനുള്ള കഴിവുണ്ടെന്ന് അദ്ദേഹം തിരിച്ചറിഞ്ഞിരുന്നില്ല. 'ട്രാന്‍സ് പുരുഷന്മാര്‍ക്കും ഗര്‍ഭം ധരിക്കാന്‍ കഴിയും. എന്റെ മുന്‍ പങ്കാളി ഞാന്‍ ഒരു വന്ധ്യയാണെന്നാണ് കരുതിയിരുന്നത്. പക്ഷേ അത് അങ്ങനെയായിരുന്നില്ല' റയാന്‍ പറഞ്ഞു. ഒരു പുരുഷനായി മാറിയതിന് ശേഷം ഒരു പെണ്‍കുട്ടി എന്ന നിലയില്‍ ഒരിക്കലും അനുഭവിക്കാത്ത സ്വാതന്ത്ര്യം തനിക്ക് അനുഭവപ്പെട്ടുവെന്ന് അദ്ദേഹം പറയുന്നു. ഒമ്പത് ആഴ്ചത്തെ ഹോര്‍മോണ്‍ ചികിത്സ കഴിഞ്ഞതിന് ശേഷമാണ് താന്‍ പത്ത് ആഴ്ച ഗര്‍ഭിണിയാണെന്ന് അദ്ദേഹം മനസ്സിലാക്കുന്നത്. 'ഇത് വലിയൊരു ഷോക്ക് ആയി. പക്ഷേ എനിക്ക് കുഞ്ഞിന്റെ ജീവനായിരുന്നു വലുത്. അവന് ജന്മം നല്കാന്‍ ഞാന്‍ തീരുമാനിച്ചു. അതിനായി ഹോര്‍മോണ്‍ ചികിത്സ പാതിയില്‍ നിര്‍ത്താന്‍ പോലും ഞാന്‍ തീരുമാനിച്ചു. അതില്‍ എനിക്ക് ദുഃഖം ഉണ്ടായിരുന്നെങ്കിലും, ഇത് വിധിയാണെന്ന് ഞാന്‍ വിശ്വസിച്ചു. എന്നാല്‍ പതുക്കെ പതുക്കെ എന്റെ എല്ലാം എന്റെ മകനായി മാറി,' റയാന്‍ പറഞ്ഞു. ഈ യാത്രയില്‍ സുഹൃത്തുക്കളുടെയും കുടുംബാംഗങ്ങളുടെയും പൂര്‍ണ്ണ പിന്തുണ റയാന് ഉണ്ടായിരുന്നു. പ്രസവം സുഗമമായി നടന്നുവെന്ന് റയാന്‍ പറഞ്ഞു. ഇപ്പോള്‍ കുഞ്ഞിന്റെ അച്ഛനും അമ്മയും എല്ലാം റയാനാണ്. കൂടാതെ, ട്രാന്‍സായ അദ്ദേഹം ഗര്‍ഭിണിയായതിന്റെ അനുഭവം മറ്റുള്ളവരുമായി പങ്കിടുന്നു. സ്തനങ്ങള്‍ നീക്കം ചെയ്യുന്ന ശസ്ത്രക്രിയയ്ക്ക് മുമ്പ് റയാന് മകനെ മുലയൂട്ടാന്‍ സാധിച്ചിരുന്നു. എന്നാല്‍ ഭാവിയില്‍ കുട്ടികള്‍ക്ക് പാല്‍ നല്‍കാന്‍ കഴിയില്ലെന്ന് ഓര്‍ക്കുമ്പോള്‍ അദ്ദേഹത്തിന് അല്പം സങ്കടമുണ്ട്. ഹെന്‍ഡ്രിക്കിന്റെ വളര്‍ച്ചയ്ക്ക് അത് അതാവശ്യമാണെന്ന് തനിക്ക് അറിയാമായിരുന്നുവെന്ന് റയാന്‍ അഭിപ്രായപ്പെട്ടു. 2021 -ലാണ്, അദ്ദേഹം സ്തനങ്ങള്‍ നീക്കം ചെയ്യാനുള്ള ശസ്ത്രക്രിയയ്ക്ക് വിധേയനാകുന്നത്. ഹെന്‍ഡ്രിക്കിന്റെ രക്ഷിതാവാകാന്‍ സാധിച്ചതില്‍ വളരെ സന്തോഷമുണ്ടെന്നും, ഒരു അച്ഛനായിരിക്കുന്നത് സുഖമുള്ള ഒരേര്‍പ്പാടാണെന്നും അദ്ദേഹം കൂട്ടിച്ചേര്‍ത്തു.