യുക്രൈന്‍ സംഘര്‍ഷം, ഭക്ഷ്യ വിതരണത്തെ ബാധിക്കും; ഫ്രഞ്ച് പ്രസിഡന്റ്

യുക്രൈനിലെ സംഘര്‍ഷം യൂറോപ്പിലെയും ആഫ്രിക്കയിലെയും ഭക്ഷ്യ വിതരണത്തെ ബാധിക്കുമെന്ന് ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍ ആശങ്ക പ്രകടിപ്പിച്ചു. യുദ്ധം ഇതിനകം യൂറോപ്പിനെ അസ്ഥിരപ്പെടുത്തിയിട്ടുണ്ടെന്നും, 12 മുതല്‍ 18 മാസത്തിനുള്ളില്‍ ഇത് കൂടുതല്‍ മോശമാകുമെന്നും മാക്രോണ്‍ പറഞ്ഞു. വെള്ളിയാഴ്ച വെര്‍സൈല്‍സില്‍ ഒരു വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം. യൂറോപ്യന്‍ നേതാക്കള്‍ റഷ്യന്‍ അധിനിവേശം തടയാന്‍ ഫലപ്രദവും ഉപയോഗപ്രദവുമായ എല്ലാം ചെയ്യുമെന്ന് മാര്‍ക്കോണ്‍ കൂട്ടിച്ചേര്‍ത്തു. അതേസമയം, യുദ്ധം ഭക്ഷ്യവില 20 ശതമാനം വര്‍ദ്ധിപ്പിക്കുമെന്നും, കാര്‍ഷിക പ്രവര്‍ത്തനങ്ങളെ ബാധിച്ചതിനാല്‍ അന്താരാഷ്ട്ര ഭക്ഷണത്തിന്റെയും തീറ്റയുടെയും വില 8-22 ശതമാനം വരെ ഉയര്‍ത്തുമെന്നും യുഎന്‍ വ്യക്തമാക്കി. യുദ്ധം തുടരുകയാണെങ്കില്‍, 2022-2023 ല്‍ 8-13 ദശലക്ഷം ആളുകള്‍ പോഷകാഹാരക്കുറവ് അനുഭവിക്കുമെന്ന് യുഎന്‍ പറയുന്നു. ആഗോള കാര്‍ഷിക വ്യാപാരത്തില്‍ റഷ്യയും യുക്രൈനും പ്രധാന പങ്കാളികളാണ്. ലോകത്തിലെ ഗോതമ്പ് കയറ്റുമതിയുടെ നാലിലൊന്ന് സംഭാവന ചെയ്യുന്നത് ഇരു രാജ്യങ്ങളും ആണ്. 2020-ല്‍ 14 ശതമാനം ചോളം കയറ്റുമതിയും അതേവര്‍ഷം ആഗോള സൂര്യകാന്തി എണ്ണ കയറ്റുമതിയുടെ 58 ശതമാനവും നടന്നതും ഇവിടെ നിന്നാണ്.