കീവ്, സൂമി അടക്കം നാലു നഗരങ്ങളില്‍ വെടിനിര്‍ത്തല്‍; മനുഷ്യത്വ ഇടനാഴി തുറക്കും

മനുഷ്യത്വ ഇടനാഴികള്‍ തുറന്നു സാധാരണക്കാരെ ഒഴിപ്പിക്കുന്നതിനായി യുക്രെയ്‌നിലെ നാലു നഗരങ്ങളില്‍ വെടിനിര്‍ത്തല്‍ പ്രഖ്യാപിച്ചു. തലസ്ഥാന നഗരമായ കീവ്, തുറമുഖ നഗരമായ മരിയുപോള്‍, മലയാളി വിദ്യാര്‍ഥികളടക്കം കുടുങ്ങി കിടക്കുന്ന ഹര്‍കീവ്,സുമി എന്നിവിടങ്ങളിലാണു താല്‍ക്കാലിക വെടിനിര്‍ത്തല്‍ പ്രഖ്യാപിച്ചത്. ഇന്ത്യന്‍ സമയം ഉച്ചയ്ക്ക് 12.30ന് വെടിനിര്‍ത്തല്‍ നിലവില്‍ വരും. സാധാരണക്കാരെ ഒഴിപ്പിക്കാന്‍ മനുഷ്യത്വ ഇടനാഴികള്‍ തുറക്കും. ഫ്രഞ്ച് പ്രസിഡന്റ് ഇമ്മാനുവല്‍ മക്രോയുടെ പ്രത്യേക അഭ്യര്‍ഥന പ്രകാരമാണ് മനുഷ്യത്വ ഇടനാഴി തുറക്കുന്നതെന്ന് റഷ്യന്‍ പ്രതിരോധ മന്ത്രാലയം അറിയിച്ചു. യുക്രെയ്ന്‍ പ്രസിഡന്റ് വൊളോഡിമിര്‍ സെലെന്‍സ്‌കിയുമായും റഷ്യന്‍ പ്രസിഡന്റ് വ്‌ലാഡിമിര്‍ പുട്ടിനുമായും മക്രോ ഫോണില്‍ സംസാരിച്ചിരുന്നു. തെക്കന്‍ യുക്രെയ്‌നിലെ രണ്ടു നഗരങ്ങളില്‍ ശനിയാഴ്ച വെടിനിര്‍ത്തല്‍ പ്രഖ്യാപിച്ചെങ്കിലും ഫലം കണ്ടിരുന്നില്ല. റഷ്യന്‍ നിയന്ത്രണത്തിലുള്ള മരിയുപോള്‍, 65 കിലോമീറ്റര്‍ അകലെയുള്ള വൊല്‍നോവാക എന്നിവിടങ്ങളിലാണ് അഞ്ചു മണിക്കൂര്‍ വെടിനിര്‍ത്തല്‍ പ്രഖ്യാപിച്ചിരുന്നത്. പ്രഖ്യാപനം പ്രഹസനമായിരുന്നെന്നും റഷ്യ ഷെല്ലാക്രമണം തുടര്‍ന്നതിനാല്‍ ആളുകളെ ഒഴിപ്പിക്കാനായില്ലെന്നും യുക്രെയ്ന്‍ പറഞ്ഞിരുന്നു. വൊല്‍നോവാകയില്‍നിന്നു 400 പേരെ ഒഴിപ്പിച്ചതായും അറിയിച്ചിരുന്നു. ഇതിനു പിന്നാലെയാണ് ഇപ്പോള്‍ രണ്ടാമത്തെ വെടിനിര്‍ത്തല്‍ പ്രഖ്യാപനം വന്നിരിക്കുന്നത്.