നിലവിലുള്ള സ്ഥലങ്ങളില്‍ നിന്ന് പുറത്തിറങ്ങരുത്; യുക്രൈനിലുള്ള ഇന്ത്യക്കാര്‍ക്ക് ജാഗ്രതാ നിര്‍ദേശം

യുക്രൈനിലുള്ള ഇന്ത്യന്‍ പൗരന്മാര്‍ക്ക് പുതിയ ജാഗ്രതാ നിര്‍ദേശം പുറത്തിറക്കി ഇന്ത്യന്‍ എംബസി. യുക്രൈയിന്റെ പല ഭാഗങ്ങളിലും റഷ്യ ശക്തമായി ആക്രമണങ്ങള്‍ നടത്തുകയും തലസ്ഥാനമായ കീവില്‍ സൈനികര്‍ നിലയുറപ്പിക്കുകയും ചെയ്തതോടെയാണ് ഇന്ത്യന്‍ എംബസി പുതിയ മാര്‍ഗനിര്‍ദേശം പുറപ്പെടുവിച്ചത്. ഉദ്യോഗസ്ഥരുടെ വ്യക്തമായ നിര്‍ദേശം ലഭിക്കാതെ നിലവിലുള്ള സ്ഥലങ്ങളില്‍ നിന്ന് പുറത്തിറങ്ങരുതെന്നും ആരും അതിര്‍ത്തി കടക്കാന്‍ ശ്രമിക്കരുതെന്നുമാണ് നിര്‍ദേശത്തില്‍ പറയുന്നത്. യുക്രൈന്‍ അതിര്‍ത്തിയിലെ ചെക്ക് പോസ്റ്റുകളൊന്നും സുരക്ഷിതമല്ല. ഇന്ത്യന്‍ പൗരന്മാരെ ഒഴിപ്പിക്കുന്നതിനായി തങ്ങള്‍ മറ്റു രാജ്യങ്ങളിലെ എംബസികളുമായി നിരന്തരം ബന്ധപ്പെട്ടു വരികയാണെന്നും ഇന്ത്യന്‍ എംബസി വ്യക്തമാക്കി. പ്രശ്‌നം രൂക്ഷമായിക്കൊണ്ടിരിക്കുന്നതിനിടെ അതിര്‍ത്തികളിലേക്ക് എത്തുന്നതിനേക്കാള്‍വ യുക്രൈന്റെ പടിഞ്ഞാറന്‍ നഗരങ്ങളില്‍ താമസിക്കുന്നത് സുരക്ഷിതമാണെന്ന് എംബസി വ്യക്തമാക്കുന്നു. യുക്രൈന്റെ കിഴക്കന്‍ ഭാഗത്തുള്ളവര്‍ ഇനിയൊരു അറിയിപ്പ് ഉണ്ടാകും വരെ അവിടെ തുടരണമെന്നും എംബസി അറിയിച്ചു.