‘റഷ്യ ലോകത്തിന്റെ നാഥനാകും, പുടിന്‍ ഭരിക്കും’ എന്ന് ബാബാ വംഗയുടെ പ്രവചനം

ഭാവിയെ കുറിച്ച് മനുഷ്യര്‍ക്ക് എപ്പോഴും ആശങ്കയാണ്, ചിലപ്പോഴൊക്കെ ഭയവുമാണ്. പ്രത്യേകിച്ചും ലോകം മൊത്തം വല്ലാത്ത അനിശ്ചിതത്വത്തില്‍ നില്‍ക്കുന്ന സമയത്ത്. ഇത്തരമൊരു സമയത്താണ് ബാല്‍ക്കണിലെ ബാബ വംഗനടത്തിയ ഒരു പ്രവചനം ചര്‍ച്ചയാകുന്നത്. അന്ധയായ വംഗ ബള്‍ഗേറിയന്‍ സന്യാസിനിയും, അതീന്ദ്രിയജ്ഞാനം അഥവാ ദിവ്യദൃഷ്ടിയുണ്ടെന്ന് വിശ്വസിച്ചുവന്ന ഒരു പ്രകൃതി ചികിത്സകയുമായിരുന്നു. 9/11 ഭീകരാക്രമണം, ബ്രെക്സിറ്റ് തുടങ്ങിയ ആഗോള സംഭവങ്ങള്‍ പ്രവചിച്ചുവെന്ന് വിശ്വസിക്കപ്പെടുന്ന ഈ അന്ധയായ സ്ത്രീ റഷ്യയ്ക്ക് വേണ്ടിയും അടുത്തതായി എന്ത് സംഭവിക്കുമെന്നും ഒരു പ്രവചനം നടത്തിയിരുന്നു. യൂറോപ്പ് 'തരിശുഭൂമി'യായി മാറിയതിനുശേഷം റഷ്യ 'ലോകത്തിന്റെ നാഥന്‍' ആകുമെന്നാണ് ഡെയ്ലി മെയില്‍ ലേഖകനോട് 85 -ാം വയസ്സില്‍ അന്തരിച്ച സ്ത്രീ പറഞ്ഞിരുന്നത്. 'എല്ലാവരും മഞ്ഞുപോലെ ഉരുകിപ്പോകും, ഒരാള്‍ മാത്രം തൊടാതെ നില്‍ക്കും - വ്ളാഡിമിറിന്റെ മഹത്വം, റഷ്യയുടെ മഹത്വം' എന്നാണ് അവള്‍ പറഞ്ഞത്. റഷ്യയെ ആര്‍ക്കും ഒന്നിനും തടയാനാകില്ല എന്നും അവര്‍ പറഞ്ഞിരുന്നു. 'അവളുടെ വഴിയില്‍ നിന്നും എല്ലാം നീക്കം ചെയ്യപ്പെടും. അവള്‍ ലോകത്തിന്റെ നാഥനായി മാറും' എന്നും അവര്‍ അഭിമുഖത്തില്‍ പറഞ്ഞു. 1911 -ല്‍ ജനിച്ച വംഗയ്ക്ക് 12 -ാം വയസ്സില്‍ ഒരു കൊടുങ്കാറ്റില്‍ പരിക്കേറ്റതിനെ തുടര്‍ന്ന് നിഗൂഢമായ രീതിയില്‍ കാഴ്ച നഷ്ടപ്പെട്ടിരുന്നു. ചുഴലിക്കാറ്റില്‍ പെട്ട് വംഗ പറന്ന് എവിടേയോ അബോധാവസ്ഥയില്‍ ചെന്നു വീഴുകയായിരുന്നുവത്രെ. തുടര്‍ന്ന് അവള്‍ക്ക് കാഴ്ച നഷ്ടപ്പെട്ടു. പിന്നീടാണ് അവള്‍ക്ക് ഭാവി കാണാനും പ്രവചിക്കാനും ഉള്ള കഴിവ് കിട്ടിയത് എന്നാണ് ആളുകള്‍ വിശ്വസിക്കുന്നത്. 5079 വരെ നീളുന്ന പ്രവചനങ്ങള്‍ വംഗ നടത്തിയിട്ടുണ്ട്. ആ വര്‍ഷം ആകുന്നതോടെ ലോകം അവസാനിക്കും എന്ന് അവള്‍ വിശ്വസിച്ചു. ചെര്‍ണോബില്‍ ദുരന്തം, സോവിയറ്റ് യൂണിയന്റെ പതനം തുടങ്ങി നിരവധി പ്രവചനങ്ങള്‍ വംഗ നടത്തി എന്ന് പറയപ്പെടുന്നു. അതുപോലെ ഐഎസിനെ കുറിച്ചും വംഗ പ്രവചനങ്ങള്‍ നടത്തിയിരുന്നു. അമേരിക്കയുടെ 44 -ാമത് പ്രസിഡന്റ് ആഫ്രിക്കന്‍-അമേരിക്കന്‍ ആയിരിക്കുമെന്നും വംഗ പ്രവചിച്ചിരുന്നു. എന്നാല്‍, അങ്ങനെ ഇല്ല എന്നുള്ള വാദങ്ങളും ഉയരുന്നുണ്ട്. മിക്ക ആളുകളും അവരെ തേടിയെത്തിരിയിരുന്നത് മരിച്ചവരോട് സംസാരിക്കാനും തങ്ങളുടെ ഭാവിയെ കുറിച്ച് അറിയാനും ആയിരുന്നു. ഒരിക്കല്‍, കാണാനെത്തിയ സ്ത്രീയോട് നിങ്ങള്‍ എനിക്ക് ഫീസൊന്നും നല്‍കേണ്ടതില്ല എന്ന് വംഗ പറഞ്ഞത്രെ. മൂന്ന് മാസം കഴിഞ്ഞ് വരുമ്പോള്‍ തന്നാല്‍ മതി എന്ന് ആദ്യം പറയുകയും പിന്നീട്, നിങ്ങള്‍ക്ക് അന്ന് വരാനാവില്ല കാരണം അപ്പോഴേക്കും നിങ്ങള്‍ മരിക്കും എന്നും വംഗ പറഞ്ഞു. രണ്ട് മാസത്തിനുള്ളില്‍ വാഹനാപകടത്തില്‍ അവരും സഹോദരിയും മരണപ്പെട്ടു എന്നും ഒരു കഥ പ്രചരിക്കുന്നുണ്ട്. ഏതായാലും ആധികാരികവും ശാസ്ത്രീയവുമായി വംഗയുടെ പ്രവചനങ്ങളെ കുറിച്ച് ഒന്നും പറയാനോ സ്ഥാപിക്കാനോ ഇല്ല. നിലവില്‍ റഷ്യ-ഉക്രൈന്‍ സംഘര്‍ഷത്തെ തുടര്‍ന്ന് വീണ്ടും വംഗയുടെ പ്രവചനം ചര്‍ച്ചയായി തുടങ്ങിയിട്ടുണ്ട് എന്ന് മാത്രം.