യുക്രെയ്‌നില്‍നിന്ന് ഒഴിപ്പിക്കല്‍ തുടങ്ങി; 470 വിദ്യാര്‍ഥികള്‍ ശനിയാഴ്ച എത്തും

യുക്രെയ്‌നില്‍നിന്ന് ഇന്ത്യന്‍ വിദ്യാര്‍ഥികളെ ഒഴിപ്പിക്കുന്ന നടപടികള്‍ തുടങ്ങി. ബുക്കോവിനയില്‍നിന്ന് വിദ്യാര്‍ഥികളുമായി പുറപ്പെട്ട എംബസിയുടെ ബസ് റുമാനിയയില്‍ എത്തി. ആദ്യ ബസിലുള്ളത് അന്‍പതോളം മെഡിക്കല്‍ വിദ്യാര്‍ഥികളാണ്. രക്ഷാദൗത്യത്തിന്റെ ഭാഗമായി റുമാനിയയിലെത്തുന്ന ആദ്യ സംഘമാണിത്. 470 വിദ്യാര്‍ഥികളെയാണ് റുമാനിയയില്‍ എത്തിക്കുന്നത്. ഇവരെ രണ്ടു വിമാനങ്ങളിലായി ശനിയാഴ്ച നാട്ടിലെത്തിക്കും. ഇന്ത്യക്കാരെ ഒഴിപ്പിക്കുന്ന നടപടികള്‍ തുടങ്ങിയെന്ന് നേരത്തെ കേന്ദ്ര വിദേശകാര്യ സഹമന്ത്രി വി.മുരളീധരനന്‍ വ്യക്തമാക്കിയിരുന്നു. 1500 ഇന്ത്യക്കാര്‍ അതിര്‍ത്തി രാജ്യങ്ങളിലെത്തി. ഇവരെ ശനിയാഴ്ച ഡല്‍ഹിയിലും മുംബൈയിലുമെത്തിക്കാനാണ് ശ്രമം. നാലുരാജ്യങ്ങളിലെ വിദേശകാര്യമന്ത്രിമാരുമായി കേന്ദ്രമന്ത്രി എസ്.ജയശങ്കര്‍ സംസാരിച്ചു. എംബസിയെ ബന്ധപ്പെട്ടാല്‍ അതിര്‍ത്തിയിലത്താനുള്ള എല്ലാ സഹായവും ലഭിക്കുമെന്നും കേന്ദ്രമന്ത്രി പറഞ്ഞു. ഇതിനിടെ, 8 കിലോമീറ്റര്‍ ദൂരം കാല്‍നടയായി സഞ്ചരിച്ച് 40 ഇന്ത്യന്‍ വിദ്യാര്‍ഥികള്‍ പോളണ്ട് അതിര്‍ത്തിയിലെത്തി. എംബസി അധികൃതര്‍ രക്ഷിക്കാനെത്തുമെന്ന പ്രതീക്ഷയിലാണ് വിദ്യാര്‍ഥികള്‍. യുക്രെയ്‌നിലെ വിമാനത്താവളങ്ങള്‍ അടച്ചതിനാല്‍ മറ്റു രാജ്യങ്ങളിലെ വിമാനത്താവളങ്ങള്‍ വഴിയാണ് രക്ഷാപ്രവര്‍ത്തനം നടത്തുന്നത്.