‘കൊവിഡ് പഴയതുപോലെ അപകടകാരിയല്ല’; നിയന്ത്രണങ്ങള്‍ പിന്‍വലിച്ച് ഡെന്മാര്‍ക്ക്

കൊവിഡ് നിയന്ത്രണങ്ങളില്‍ ഭൂരിഭാഗവും പിന്‍വലിച്ച് ഡെന്മാര്‍ക്ക്. കൊവിഡ് പഴയതുപോലെ അപകടകാരിയല്ല എന്ന വിശദീകരണമാണ് തീരുമാനത്തിന് സര്‍ക്കാര്‍ നല്‍കുന്നത്. ഒമിക്രോണ്‍ വകഭേദമാണ് രാജ്യത്ത് ഇപ്പോള്‍ പടരുന്നത്. ഒമിക്രോണ്‍ വകഭേദം അത്ര ഗുരുതരമായതല്ല എന്ന് നേരത്തെ പഠനങ്ങള്‍ വന്നിരുന്നു. മാത്രമല്ല, ഉയര്‍ന്ന വാക്‌സിനേഷന്‍ നിരക്കും ഡെന്മാര്‍ക്കിലുണ്ട്. ഇതൊക്കെ ഇങ്ങനെയൊരു തീരുമാനം എടുക്കുന്നതില്‍ നിര്‍ണായകമായി. നിയന്ത്രണങ്ങള്‍ എല്ലാം നീക്കുകയല്ല എന്ന് പ്രധാനമന്ത്രി മേറ്റ് ഫ്രെഡെറിക്‌സണ്‍ പറഞ്ഞു. ശരത് കാലത്ത് എന്ത് സംഭവിക്കുമെന്നറിയില്ല. ചിലപ്പോള്‍ പുതിയ വകഭേദം വന്നേക്കാമെന്നും അദ്ദേഹം പറഞ്ഞു. അടുത്ത കാലത്തായി രാജ്യത്ത് ദിനേന 50,000ലധികം കൊവിഡ് കേസുകള്‍ റിപ്പോര്‍ട്ട് ചെയ്യപ്പെടുന്നുണ്ടെങ്കിലും ആശുപത്രികളില്‍ അത്യാഹിത വിഭാഗത്തില്‍ പ്രവേശിക്കപ്പെടുന്നവര്‍ കുറവാണ്. യൂറോപ്യന്‍ യൂണിയനിലെ പല രാജ്യങ്ങളും കൊവിഡ് നിയന്ത്രണങ്ങള്‍ പിന്‍വലിക്കുകയാണ്. കഴിഞ്ഞ ആഴ്ച, മാസ്‌ക് ഉള്‍പ്പെടെ എല്ലാ നിയന്ത്രണങ്ങളും ഇംഗ്ലണ്ട് പിന്‍വലിച്ചിരുന്നു. കൊവിഡ് പോസിറ്റീവായാല്‍ സ്വയം ഐസൊലേറ്റ് ആവുക എന്നത് മാത്രമാണ് ഇപ്പോള്‍ ഇംഗ്ലണ്ടിലെ നിയമ. കൊവിഡിനൊപ്പം ജീവിക്കുക എന്ന രീതിയാണ് അവിടെ സ്വീകരിക്കുന്നത്.