‘ജയ ജയ ജയ ജയ ഹേ’യിലെ ‘ജയ ഭാരതി’; ദര്‍ശനയുടെ കഥാപാത്രത്തെക്കുറിച്ച് സംവിധായകന്‍

ബേസില്‍ ജോസഫ്-ദര്‍ശന രാജേന്ദ്രന്‍ ചിത്രം 'ജയ ജയ ജയ ജയ ഹേ' എന്ന സിനിമയിലെ ദര്‍ശനയുടെ കഥാപാത്രത്തെക്കുറിച്ച് സംവിധായകന്‍ വിപിന്‍ ദാസ്. ജയ ഭാരതി എന്ന കഥാപാത്രത്തെയാണ് ദര്‍ശന ചിത്രത്തില്‍ അവതരിപ്പിക്കുന്നത്. ടൈംസ് ഓഫ് ഇന്ത്യയോടായിരുന്നു സംവിധായകന്റെ പ്രതികരണം. 'ഇതൊരു ഫാമിലി സിനിമയാണ്. ചിത്രത്തില്‍ ജയ ഭാരതി എന്ന കഥാപാത്രത്തെയാണ് ദര്‍ശന അവതരിപ്പിക്കുന്നത്. ഒരു ഇടത്തരം കുടുംബത്തിലുള്ള 22 വയസായ പെണ്‍കുട്ടിയാണ് ജയ ഭാരതി. 22 വയസുള്ള ഒരു പെണ്‍കുട്ടി ജനനം മുതല്‍ അഭിമുഖീകരിക്കേണ്ടി വരുന്ന കാര്യങ്ങളാണ് ചിത്രത്തില്‍ അവതരിപ്പിക്കുന്നത്.' വിപിന്‍ ദാസ് പറഞ്ഞു. കഴിഞ്ഞ ദിവസം പുറത്തുവിട്ട് സിനിമയുടെ ഫസ്റ്റ് ലുക്ക് പോസ്റ്റര്‍ വന്‍ സ്വീകാര്യത നേടിയിരുന്നു. ദര്‍ശനയുടെ മുടിയില്‍ നിറയെ കശുമാമ്പഴമുള്ള ചിത്രവുമായിരുന്നു ഫസ്റ്റ് ലുക്ക്. പോസ്റ്ററിന് പിന്നിലെ കാരണവും സംവിധായകന്‍ വ്യക്തമാക്കുന്നുണ്ട്. 'സിനിമയുടെ പ്രധാന ഷൂട്ടിങ് ലൊക്കേഷന്‍ കൊല്ലം ആണ്. കൊല്ലത്ത് ധാരാളെ കശുമാവുണ്ട്. കൂടാതെ കശുമാമ്പഴത്തിന്റെ ഒരു രുചിയും ഈ സിനിമക്കുണ്ട്' -സംവിധായകന്‍ പറഞ്ഞു. ജാന്‍ എ മന്‍ എന്ന ചിത്രത്തിന് ശേഷം ചീയേഴ്‌സ് എന്റര്‍ടെയ്ന്‍മെന്റ്‌സിന്റെ ബാനറില്‍ ഒരുങ്ങുന്ന ചിത്രമാണ് ജയ ജയ ജയ ജയഹേ. ലക്ഷ്മി വാര്യരും ഗണേഷ് മേനോനുമാണ് ജയ ജയ ജയ ജയ ഹേ നിര്‍മ്മിക്കുന്നത്.