കാമുകിയെ ജാമ്യത്തിലിറക്കാന്‍ മോഷണത്തിനിടെ ഇരട്ടക്കൊല: യുഎസിലെ 2022ലെ ആദ്യത്തെ വധശിക്ഷ

2022 ലെ ആദ്യ വധശിക്ഷ നടപ്പാക്കി യുഎസ്. 21 വര്‍ഷം മുന്‍പ് നടന്ന ഇരട്ടക്കൊലപാതകത്തിലെ പ്രതി ഡോണാള്‍ഡ് ഗ്രാന്റിന്റെ (46) വധശിക്ഷയാണ് നടപ്പിലാക്കിയത്. ഒക്ലഹോമയില്‍ വിഷമിശ്രിതം കുത്തിവച്ചായിരുന്നു വധശിക്ഷ നടപ്പാക്കിയത്. ജയിലില്‍ കഴിയുകയായിരുന്ന കാമുകിയെ ജാമ്യത്തിലിറക്കാനുള്ള പണം കണ്ടെത്തുന്നതിനു വേണ്ടിയാണ് 2001 ല്‍ 25 വയസ്സ് പ്രായമുണ്ടായിരുന്ന ഡോണാള്‍ഡ് മോഷണത്തിനിറങ്ങിയത്. ഹോട്ടലില്‍ മോഷണശ്രമം തടയാന്‍ ശ്രമിച്ച രണ്ട് ജീവനക്കാര്‍ക്കു നേരേ പ്രതി വെടിയുതിര്‍ക്കുകയായിരുന്നു. വെടിയേറ്റ് ജീവനക്കാരിലൊരാള്‍ തല്‍ക്ഷണം മരിച്ചു. രണ്ടാമനെ കത്തി കൊണ്ട് കുത്തി മരണം ഉറപ്പു വരുത്തി. 2005ല്‍ ഡോണാള്‍ഡ് ഗ്രാന്റിനെ കോടതി വധശിക്ഷയ്ക്ക് വിധിച്ചു. കോടതി വധശിക്ഷയ്ക്കു വിധിച്ചതിനു പിന്നാലെ നിരവധി അപ്പീലുകളാണ് ഇയാള്‍ നല്‍കിയത്. വധശിക്ഷ നടപ്പാക്കുന്നതിന് പ്രാകൃതമായ വിഷമിശ്രിതം ഉപയോഗിക്കരുതെന്നും വെടിവച്ചു (ഫയറിംഗ് സ്‌ക്വാഡ്) ശിക്ഷ നടപ്പിലാക്കണമെന്നും ആവശ്യപ്പെട്ടുള്ള ഡോണാള്‍ഡ് ഗ്രാന്റിന്റെ ഹര്‍ജി ബുധനാഴ്ച യുഎസ് സുപ്രീംകോടതി തള്ളിയിരുന്നു. വ്യാഴാഴ്ച രാവിലെ 10.16 നാണ് ഗ്രാന്റിന്റെ മരണം സ്ഥിരീകരിച്ചത്. 10.03 ന് വിഷമിശ്രിതം കുത്തിവച്ചു. 10.08 ന് അബോധാവസ്ഥയിലാകുകയും 13 മിനിറ്റിനുള്ളില്‍ മരണം സംഭവിക്കുകയും ചെയ്തു. യുഎസിലെ 23 സംസ്ഥാനങ്ങളില്‍ വധശിക്ഷ നിര്‍ത്തലാക്കിയിരുന്നു. കലിഫോര്‍ണിയ, ഒറിഗോണ്‍, പെന്‍സില്‍വാനിയ എന്നിവടങ്ങളില്‍ വധശിക്ഷയ്ക്ക് മോറട്ടോറിയം പ്രഖ്യാപിച്ചിട്ടുണ്ട്. ഒക്ലഹോമയില്‍ 2015 ല്‍ വധശിക്ഷയ്ക്ക് താത്കാലിക മൊറട്ടോറിയം ഏര്‍പ്പെടുത്തിയിരുന്നെങ്കിലും 2021 ല്‍ പിന്‍വലിച്ചു.