‘എല്ലാത്തിനും അതിന്റേതായ സമയമുണ്ട്’; ജൂനിയര്‍ ദാസനും വിജയനും ദുബായ് കടപ്പുറത്ത്

മലയാള സിനിമകളിലെ എക്കാലത്തെയും മികച്ച കോംമ്പിനേഷനുകളില്‍ ഒന്നായിരുന്നു നാടോടിക്കാറ്റില്‍ മോഹന്‍ലാലും ശ്രീനിവാസനും അവതരിപ്പിച്ച ദാസനും വിജയനും. ദുബായ് കടപ്പുറമാണെന്ന് കരുതി ചെന്നൈ ബസന്ത് നഗര്‍ ബീച്ചില്‍ ദാസനും വിജയനും എത്തിയിട്ട് 35 വര്‍ഷം പിന്നിട്ടു. അതേ കടപ്പുറത്ത് വിനീത് ശ്രീനിവാസനും പ്രണവ് മോഹന്‍ലാലും ഒന്നിച്ചുള്ള ചിത്രമാണ് ഇപ്പോള്‍ സോഷ്യല്‍ മീഡിയയില്‍ വൈറലാകുന്നത്. 'നോ ക്യാപ്ഷന്‍' എന്ന ക്യാപ്നോടെ വിനീത് തന്നെയാണ് ചിത്രം സാമൂഹിക മാധ്യമങ്ങളില്‍ പങ്കുവച്ചത്. ഫോട്ടോ പങ്കുവച്ച് നിമിഷങ്ങള്‍ പിന്നിട്ടപ്പോഴേക്കും സാമൂഹിക മാധ്യമങ്ങളില്‍ വൈറലാവുകയായിരുന്നു. താരങ്ങളടക്കം നിരവധി പേരാണ് കമന്റുമായി എത്തിയിട്ടുള്ളത്. 'ഞാന്‍ പറഞ്ഞില്ലേ ദാസാ എല്ലാത്തിനും അതിന്റേതായ സമയമുണ്ടെന്ന്' എന്നായിരുന്നു ജൂഡ് ആന്റണിയുടെ കമന്റ്. 'ഞാന്‍ കൊടുത്തോട്ടെ അടിക്കുറിപ്പ്', 'ഈ ഫോട്ടോയ്ക്ക് എന്തിനാണ് ക്യാപഷന്‍', ജൂനിയര്‍ ദാസനും വിജയനും ദുബായ് കടപ്പുറത്ത്' തുടങ്ങിയ കമന്റുകളാണ് ഫോട്ടോയ്ക്ക് താഴെ ഉയരുന്നത്. അതേസമയം, പ്രണവ് മോഹന്‍ലാലിലെ നായകനാക്കി വിനീത് ശ്രീനിവാസന്‍ സംവിധാനം ചെയ്ത സിനിമ 'ഹൃദയ'ത്തിന് മികച്ച പ്രതികരണമാണ് ലഭിക്കുന്നത്. പ്രണവിന് പുറമെ കല്യാണി പ്രിയദര്‍ശന്‍, ദര്‍ശന രാജേന്ദ്രന്‍ തുടങ്ങിയവരാണ് ഹൃദയത്തിലെ പ്രധാന താരങ്ങള്‍. യുവ ഗായകന്‍ ഹിഷാം അബ്ദുള്‍ വഹാബ് ആണ് 'ഹൃദയ'ത്തില്‍ സംഗീത സംവിധാനം നിര്‍വഹിച്ചിരിക്കുന്നത്. മെറിലാന്‍ഡ് സിനിമാസിന്റെ ബാനറില്‍ വിശാഖ് സുബ്രഹ്‌മണ്യമാണ് ചിത്രം നിര്‍മ്മിക്കുന്നത്.