ആന്റണി പെരുമ്പാവൂര്‍ ‘എസ് ഐ ആന്റണി ജോസഫ്’ആയതെങ്ങനെ; ‘ബ്രോ ഡാഡി’ വീഡിയോ

മോഹന്‍ലാലിനെ നായകനാക്കി പൃഥ്വിരാജ് സംവിധാനം ചെയ്യുന്ന ബ്രോ ഡാഡിയുടെ പുതിയ പ്രൊമോ വീഡിയോ പുറത്ത്. ചിത്രത്തിലെ ആന്റണി പെരുമ്പാവൂരിന്റെ കഥാപാത്രത്തെ പരിചയപ്പെടുത്തുന്നതാണ് വീഡിയോ. എസ് ഐ ആന്റണി ജോസഫ് എന്ന കഥാപാത്രമായാണ് ആന്റണി പെരുമ്പാവൂര്‍ എത്തുന്നത്. എങ്ങനെയാണ് ആന്റണി പെരുമ്പാവൂര്‍ സിനിമയിലേക്കെത്തുന്നതെന്നാണ് വീഡിയോയിലുള്ളത്. സിനിമക്ക് വേണ്ടി ആന്റണി പെരുമ്പാവൂരിനെ കണ്ട് മോഹന്‍ലാലിന്റെ ഡേറ്റ് വാങ്ങിച്ചെടുക്കാനെത്തുന്ന പൃഥ്വിരാജ് ആന്റണി പെരുമ്പാവൂരിന് ചിത്രത്തിലെ സബ് ഇന്‍സ്പെക്ടര്‍ വേഷം കാണിച്ച് വീഴ്ത്തുന്നതാണ് വീഡിയോ. 'എസ് ഐ ആന്റണി ജോസഫ് ... ഇത് കലക്കും. ഞങ്ങള്‍ക്ക് കാത്തിരിക്കാന്‍ വയ്യ നിങ്ങള്‍ക്കോ?' എന്ന ക്യാപ്ഷനോടെയാണ് വീഡിയോ പങ്കുവച്ചിട്ടുള്ളത്. ലൂസിഫറിന് ശേഷം മോഹന്‍ലാലും പൃഥ്വിരാജും ഒന്നിക്കുന്ന ചിത്രമാണ് ബ്രോ ഡാഡി. മോഹന്‍ലാലിന്റെ മകന്റെ വേഷമാണ് ചിത്രത്തില്‍ പൃഥ്വിരാജ് ചെയ്യുന്നത്. കൂടാതെ ചിത്രത്തില്‍ മീന, കനിഹ, കല്യാണി പ്രിയദര്‍ശന്‍, ലാലു അലക്സ്, ജഗദീഷ്, സൗബിന്‍ എന്നിങ്ങനെ വന്‍ താരനിരയാണ് അണിനിരക്കുന്നത്. ചിത്രം ഡിസ്നി പ്ലസ് ഹോട്ട്സ്റ്റാറിലൂടെ ജനുവരി 26ന് പുറത്തിറങ്ങും. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ചിത്രം നിര്‍മ്മിക്കുന്നത്. ശ്രീജിത്ത് ബിബിന്‍ തിരക്കഥ നിര്‍വ്വഹിച്ച ചിത്രം ഒരു ഫാമിലി ഡ്രാമയാണ്. അഭിനന്ദ് രാമാനുജം ഛായാഗ്രഹണം നിര്‍വ്വഹിക്കുന്ന ചിത്രത്തിന്റെ എഡിറ്റര്‍ അഖിലേഷ് മോഹനാണ്. ദീപക് ദേവാണ് സംഗീത സംവിധായകന്‍.