പഴയ രമണനെ ഓര്‍മ്മിപ്പിക്കും ഈ വീഡിയോ; തളിപ്പറമ്പ ചന്തയില്‍ ഹരിശ്രീ അശോകന്‍

മുതലാളി തൊഴിലാളി ബന്ധത്തിന്റെ ഉത്തമ ഉദ്ദാഹരണമായ പഞ്ചാബി ഹൗസിലെ കൊച്ചിന്‍ ഹനീഫയെയും ഹരിശ്രീ അശോകനെയും മലയാളികള്‍ മറക്കില്ല. പഴയ രമണനെ ഓര്‍മ്മിപ്പിക്കും വിധം ഹരിശ്രീ അശോകന്റെ ഒരു വീഡിയോയാണ് ഇപ്പോള്‍ സാമൂഹിക മാധ്യമങ്ങളില്‍ വൈറലാകുന്നത്. പുതിയ സിനിമയുടെ ചിത്രീകരണത്തിന്റെ ഭാഗമായി തളിപ്പറമ്പ ചന്തയില്‍ മീന്‍ വില്‍ക്കുന്ന ഹരിശ്രീ അശോകനാണ് വീഡിയോയിലുള്ളത്. കച്ചവടക്കാര്‍ക്ക് മീന്‍ പെട്ടി നല്‍കി ശേഷം പണം വാങ്ങി മടങ്ങുന്നതാണ് വീഡിയോയില്‍ കാണാനാവുന്നത്. ഹരിശ്രീ അശോകന്‍ നായകനാകുന്ന അന്ത്രുമാന്‍ എന്ന ചിത്രത്തിന്റെ ഷൂട്ടിംഗിനിടയില്‍ നിന്നുള്ള ദൃശ്യങ്ങളാണിതെന്നാണ് റിപ്പോര്‍ട്ടുകള്‍. ശിവകുമാര്‍ കങ്കോലയാണ് ചിത്രത്തിന്റെ കഥയും തിരക്കഥയും ഒരുക്കിയിരിക്കുന്നത്. സിനിമയില്‍ മീന്‍ ചന്തയിലെ തൊഴിലാളിയുടെ കഥാപാത്രത്തെയാണ് ഹരിശ്രീ അശോകന്‍ അവതരിപ്പിക്കുന്നത്.ടൊവിനോ തോമസ് നായകനായ മിന്നല്‍ മുരളിയാണ് ഹരിശ്രീ അശോകന്റെ ഏറ്റവും ഒടുവില്‍ റിലീസ് ചെയ്ത ചിത്രം. ചിത്രത്തില്‍ ഹരിശ്രീ അശോകന്‍ അവതരിപ്പിച്ച ദാസന്‍ എന്ന കഥാപാത്രം ഏറെ പ്രേക്ഷക ശ്രദ്ധ നേടിയിരുന്നു.